Uei : 18/11/2018

Benaset Roux : 22 ans de far viure lo país

Benaset Roux es l’òme que nos a portat l’occitan pendent fòrça ans a France 3 e qu’a daissat lo programa Viure al País per anar un pauc mai amont sus aquela meteissa cadena de television. Lo rescontrèrem a Narbona lo 16 de setembre passat a l’ocasion de la Dintrada e parlèrem amb el de sa carrièra en occitan a la television e de son avenir professional.

 

« Fa 22 ans qu’intrèri a France 3, en 1995, e veni de partir après 22 ans de far Viure al País entre d’autras causas. Es gràcias a Maurici Andrieu qu’intrèri a la television perque ieu aviái començat a la ràdio. La ràdio èra lo mèdia que mai m’interessava e doncas comencèri de far de comentaris de las partidas de fotbòl, de rugbi, de basquet, tot aquò en francés a Radio France, e alavetz En Maurici me venguèt cercar e me diguèt : « Te caldriá venir perque cercam qualqu’un per la television, ieu soi près de la retirada, te caldriá venir... » E es aital qu’intrèri a France 3 après aver fach los estudis de jornalisme a Bordèu. Dempuèi que soi aquí ai vist passar un vintenat de personas amb qui ai trabalhat a France 3 e malastrosament la majoritat tornèron partir perque i aviá pas l’avenidor segur a France 3, avián enveja de far quicòm mai.

Ai fach lo trabalh melhor possible, en i metent tot lo còr e tota l’energia, e tota la resisténcia tanben perque es pas aisit de far de television en occitan dins lo servici public, mas es important de far d’occitan dins lo servici public, e ieu me’n vau perque ne vòli pas far la sason de tròp, la lassièra d’èsser aquí e l’enveja de mancar... E doncas soi content de daissar lo programa en bona forma amb de gents que son aquí per n’assegurar la subrevivença, e sabi que las emissions van progressar, van cambiar, donc aquò d’aquí èra fondamental. E ieu voliái pas demorar per demorar e m’acrancar a quicòm ont començavi d’èsser las. Me’n vau pas tròp luènh, en Tarn, per m’ocupar del jornal en francés qu’es aquí cada ser e que fa sèt minutas, es totjorn France 3, es totjorn de jornalisme, es totjorn anar sul terren e far de presentacions mas es una pagina novèla e tròbi qu’es plan de se poder confrontar a de situacions diferentas, aquò te fa progressar, te càmbia un pauc, e es totjorn d’èsser viu e far de causas novèlas. Soi per la diversitat. Se tròba qu’a un moment donat i aviá Roergue pas mal, per çò que lo Maurici cresquèt en Roergue, Clamenç Alet èra de Roergue, Regis Tardieu èra de Roergue, Benaset Roux es de Roergue, doncas tot aquò es francament un còp d’astre, cercàvem pas pas de far una màfia avaironesa o roergassa, se tròba aital, mas soi content que i aja de diversitat, de diversitat n’avèm perque as parlat de Provença, efectivament amb En Màrius qu’es lengadocian provençal mas avèm tanben la Sirine Tijani qu’a un paire de tunisian e una maire gascona, doncas aquela diversitat m’agrada ».

Ferriòl Macip

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+