Uei : 20/11/2018

Entervista Stéphane Valentin — « Voler mei d'occitan dens mèdias qui son en pèrta d'aviada qu'ei contraproductiu »

La television hertziana qu’ei en pèrta d’aviada, quin gaharà la virada sus internet ? Enter Naq TV, FIPA e Contracte d’Objectius e de Mejans, Stéphane Valentin (man esquèrra sus la fòto), cargat de produccion d’OCtele que’ns balha quauques elements de responsa.

Sus internet, que i a dejà OCtele, Tè Vé Òc o Dètz TV, mes que n’i aurà benlèu d’autas d’ací quauques temps : en efèit, los professionaus de l’audiovisau que son tots a pensar un navèth anar de difusion tà remplaçar la television « classica ». Entà Stéphane Valentin , cargat de produccion a OCtele, qu’ei tot vist : la television tradicionau qu’ei passada de mòda. E ne calerà pas mancar la virada internet.

 

La Setmana — Que’n pensatz d’aqueths manifestants qui vòlen l’occitan a la television cada dia ?
Stéphane Valentin — Aquestes, ne’us coneishi pas, e ne ns’an pas jamèi consultats. Benlèu n’espian pas la television sus internet, qui representa uei lo dia 40 % deu consum deus espectators. Mes se vòlen mei d’occitan a la television, que serén avisats d’anar cap aus qui’n hèn ! OCtele qu’ei convencionada CSA, qu’emet sus internet e n’i a pas un dia shens nautats en video ! Taus qui ne vòlen, que sufeish d’i anar. LS — E France 3 ? SV — A France 3, que’s pausan questions per aquestes torns. Que cau gahar la virada cap a internet, qui serà de mau gerir taus mèdias classics. Voler mei d’occitan dens mèdias qui son en pèrta d’aviada qu’ei contraproductiu... Qu’ei benlèu pr’amor d’açò que n’i a pas qu’un trentenat qui ac demandan...

LS — Çò qui’s passa sus internet alavetz ?
SV — En Navèra-Aquitania, on ei diferent de çò qui’s passa en Occitania, France 3 qu’ei a crear, mercés a un navèth Contracte d’Objectius e de Mejans ua navèra cadena, qui peu moment s’apèra Naq TV, qui va obrir en seteme augan, e qui serà hòrt escrutada per las autas regions. Que serà ua television convencionada CSA sus internet, on i aurà navèras fòrmas d’escrituras audiovisaus, e qui serà hornida per hèra de productors locaus, dab un vertadèr engatjament per las lengas regionaus.

LS — Ei concrèt uei lo dia ?
SV — Que i a dejà 40 numèros per an sus tres ans d’ua emission qui vam produsir e qui serà codifusada sus aquera antena Naq TV... Donc mei d’occitan a la television que n’i aurà. Peu moment sonque en Navèra-Aquitania, mes que cau que hàcin tot parièr en Occitania.

LS — Internet que passa donc la television classica ?
SV — Uei lo dia, 21 % de’us qui espian la television qu’ac hèn dab ua tauleta o un smartfòne. 45 % deus joens de mensh de 18 ans qui l’espian sonque atau. Qu’an deishat per de bon la television classica. Los estudiants ne’n crompan pas mei. Ne van pas mei cap au flumi audiovisuau de contunh.

LS — E los autes ? Los mensh joens ?
SV — Los ancians qu’i son tostemps. L’atge mejan de’us qui espian France 3 qu’ei passat de 57 ans tres ans a a 60 ans e miei augan. Donc, que vad vielha, la television, e los qui l’espian tanben. E a un moment dat, que’s cau demandar çò que vòlen los mei joens...

LS — Que’s debanè la setmana passada lo FIPA (Hestau internacionau deus programas audiovisuaus) a Biàrritz. I avetz parlat d’aviéner... sus internet ?
SV — Quiò. Qu’i hasom ua presentacion, dab los de France 3, TV7 Bordèu, Kanaldude e OCtele de çò qu’anavam demandar aus professionaus de l’audiovisuau deus nostes parçans entà aviar programas tanlèu la rentrada, enqüèra un còp dens l’encastre d’aqueth Contracte d’Objectius e de Mejans. E peu prumèr còp de l’istòria, sus las quate cadenas, duas qu’èran dejà en lenga regionau, mes las autas duas que’s son engatjadas a ne difusar tanben. Segon los lors critèris pròpis, mes totun. Fin finau, en Navèra-Aquitania, que i aurà ua hauça importanta de difusion audiovisuau en lenga regionau.

LS — Que parlatz de Naq TV... N’i a pas un equivalent en Occitania ?
SV — Las realitats que son diferentas en las duas regions. En Occitania, que i avè dejà mèdias en plaças en quauquas vilas com Tolosa o Montpelhièr. Au sortir de la mauescaduda de Télé Toulouse qu’arribè Médias du Sud dab d’autas accionaris e qu’estó creada en seteme passat Vià Occitanie dab quate cadenas locaus. La region qu’i jòga hèra dessús au nivèu politic. Peu moment qu’espiam çò qui s’i passa, qu’èm a véder quin i poderam contribuir. Mes en Navèra-Aquitania, qu’èra ua volontat deu president de Region Alain Rousset de tornar véder aqueth Contracte d’Objectius e de Mejans. En Occitania, que va benlèu caler esperar la medisha causa, o benlèu que poderam dejà aviar mei de collaboracions... Çaquelà, OCtele qu’ei sus internet, e donc presenta suu territòri sancèr. Que rodam hòrt sovent en Occitania.

LS — Que parlatz de quantitat de produccions, mes que cau tanben véder la qualitat... Uei lo dia, en tèrmis de mejans, de tecnologia o de materiau, e’vs podetz comparar a la television classica ?
SV — Qu’ei incomparable ! Se parlam de budget, un reportatge France 3 de quauquas minutas que representa un mes de budget OCtele. Qu’avem mei de mejans, mes entà mesurà’s a ua cadena classica, que caleré hornir dus zèros ! Lo noste contienut qu’ei adaptat a internet, mes non seré pas « broadcast » tà la TNT o lo hertzian, qu’ac sabem. E se volem collaborar dab France 3 per exemple, que’ns va caler anar enqüèra mei luenh. Mes peu moment, n’ei pas important. Que i a d’audiovisuau en occitan. N’ei pas perfèit, mes qu’ei dejà miélher que quate ans a, on n’i avè pas arren...

LS — Tot aquò dab lo sostien politic indispendable ?
SV — Solide, l’OPLO qu’ei lo partenari màger, dab tanben lo Departament deus Pirenèus-Atlantics, qui’ns sostien deu debut enlà. Que i a ajudas, mes sus un projècte, qu’ac precisi. Ne parlam pas de foncionament.

LS — Quaus son las nautats sus OCtele per 2018 ?
SV — « Espòrt d’aquí », ua emission mensuau de 6 minutas qui va arribar pro lèu, tanben ua emission patrimoniau dab collegians qui’s passejan en endrets desconeguts, e d’autas causas enqüèra.

Entervista Joan-Nadau Commères

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+