Uei : 20/10/2018

Atemptat de Barcelona : encara i a de questions

Mièg an après los atemptats en Catalonha, encara i a d'arrestacions mentre que creisson las sospièchas sul restacament del cap del comando e los servicis secrets.

Lo 20 de febrièr passat arrestèron, près de Nimes e d'Albi, tres personas restacadas amb los atemptats que los patiguèron Barcelona e Cambrils lo 17 d'agost passat. Solament un dels detenguts es estat acusat, los autres dos son en libertat. Lo detengut es un òme nascut en 1986, l'arrestèron près d'Albi e es acusat de conspiracion criminala e de terrorisme. El seriá ligat dirèctament amb Driss Oukabir, l'òme que loguèt la camioneta que se roncèt sus la molonada dins la Rambla de Barcelona. Oukabir es ara en preson. Mièg an après lo chaple, l'escàndol arriba quan se sospiècha cada còp mai que lo cap del comando terrorista èra restacat amb los servicis secrets espanhòls.

La guèrra bruta de l'Estat contra l'independentisme catalan

La guèrra bruta de l'Estat espanhòl contra l'independentisme catalan poiriá èsser restacada amb l'atemptat terrorista que patiguèron Barcelona e Cambrils lo 17 d'agost passat, segon una tièra de fiuladas qu'a publicadas sus Twitter Mireia Boya. L'èx-deputada occitana del Parlament de Catalonha pressent que l'encarceracion del ministre regional de l'Interior de Catalonha, Joaquim Forn, e la destitucion del cap de la polícia catalana, Josep Lluís Trapero, an quicòm a veire. Boya se demanda perqué Forn es totjorn en preson, e respond qu'es a causa de la gestion que faguèt dels atemptats. Dins una sèria d'onze fiuladas, Boya relata una guèrra intèrna entre la ministra espanhòla de la defensa, María Dolores de Cospedal, e la vicepresidenta del govèrn espanhòl, Soraya Sáenz de Santamaría. D'autre caire, la politiciana aranesa critica l'informacion polemica que la bandiguèt un jornal : aqueste assegurava « en exclusivitat » que la polícia catalana aviá recebut d'entresenhas dels servicis secrets dels Estats Units. Se tractava d'una informacion que publicava una « nòta originala » de la CIA, que curiosament èra redigida en un anglés fòrça marrit e clafit de decas. Enfin, Boya assolida que l'encarceracion de Forn es « un servici a Cospedal » que li fa lo jutge Llarena, del Tribunal Suprèm espanhòl, qu'instrutz lo procès contra los independentistas catalans. De soslinhar que la gestion que faguèron Forn e Trapero foguèt remirabla e aquestes capitèron a desactivar la cellula jihadista en pauques jorns, en tot evitar d'atemptats fòrça pus sagnoses. En seguida d'aquò, la polícia espanhòla e la Gàrdia Civila planguèron qu'aquela gestion mostrèsse l'imatge « d'un Estat catalan autosufisent ».

L'escandalosa relacion de l'imam de Ripoll amb lo CNI

De fach, Boya es pas la primièra a presentar aquela sospiècha, e mai s'ela o a fach net e clar. Lo mes passat, los deputats d'ÈRC e PDECat del Congrès dels Deputats espanhòl demandèron la compareissença del ministre de l'Interior, Juan Ignacio Zoido, per qu'esclarisquèsse los ligams de l'imam de la vila de Ripoll, Abdelbaki Es Satty — cervèl d'aqueles atemptats— e lo CNI, es a dire lo servici d'entresenha e contraespionatge espanhòl.

Segon qualques informacions destapadas en novembre passat, Es Satty foguèt informator del CNI almens los ans 2010 e 2014. En mai d'aquò ara, sièis meses après l'atemptat, mai d'un elegit a demandat d'explicacions a l'estat espanhòl per las relacions entre l'imam e lo CNI, dont la consolessa màger de Barcelona, Ada Colau, los cònsols màgers de Cambrils e Ripoll e tanben lo president de la Generalitat de Catalonha en exili, Carles Puigdemont. D'efièch, Puigdemont demandèt publicament a l'Estat espanhòl fa qualques jorns dins una entrevista a Catalonha Ràdio : « A quicòm per explicar ? Amaga qualque mena d'informacion ? Que faguèt lo CNI amb l'imam de Ripoll pendent totes los ans precedents ? ». En mai d'aquò, plusors operacions antijihadistas dels Mòssis d'Esquadra son estadas entrepachadas après que « los terroristas foguèron avertits prèviament per d'informators » , coma ben precisèt lo deputat catalan Feliu Guillaumes quand demandèt la compareissença de Zoido.

L'IEA-AALO avertís que l'occitan en Aran es en perilh de desaparicion

Lo Conselh Permanent de l'Institut d'Estudis Araneses – Academia Aranesa de la Lenga Occitana (IEA-AALO) avertís que « sense un tractament de preferéncia, sense proteccions pariones, que compensen eth desequilibri existent, respècte des autes dues lengües oficiaus, era lengua pròpria d'Aran ei menaçada de rapida desaparicion ». Es çò qu'emana del comunicat de l'institucion aranesa que condemna e planh la decision del Tribunal Constitucional espanhòl qu'aquesta setmana a anullats los articles de la Lei de l'Occitan que declaravan la lenga nòstra preferenciala en Aran. L'IEA-AALO critica « un incompliment der estat espanhòu respècte des disposicions dera Carta Europèa des Lengües Regionaus e Minoritàries (ratificada per Espanha eth 2 de heurèr de 2001) » e remarca qu'« era lengua occitana ei un patrimòni internacionau qu'er Estat compartís damb tres estats europèus mès e qu'aurie d'èster objècte de major reconeishement e promocion ». Enfin, l'acadèmia aranesa , en avalorar la senténcia del TC que declara inconstitucional lo mot « prefencial » de la Lei 35/2010 de l'occitan, sollicita de las institucions catalanas e aranesas qu'aquela anullacion de la preferéncia lingüistica de l'aranés li servisca a el coma motor per aumentar la preséncia de l'aranés e sos refortiment e promocion tant en Val d'Aran coma Catalonha. Segon l'Institut, s'es fach aital pen—dent los darrièrs 40 ans malgrat que la lenga occitana en Aran patisca una situacion « d'anormalitat lingüistica e de desequilibri » a respècte del catalan e de l'espanhòl.

Ferriòl Macip

Fòto : Panèl rotièr en omenatge a las victimas de l'ataca. (ZarlokX)

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+