Uei : 24/11/2017

Martinica : demandan que lo drapèl dels esclavatgistas quite d'èsser lo drapèl oficial

Lo CRAN e lo CO-10 Mai an lo sosten de qualques personalitats de l’illa per remplaçar « lo drapèl de la vergonha » pel « drapèl de la dignitat ».

La bandièra de l’illa de Martinica es totjorn lo simbòl dels naviris negrièrs, que s’adoptèt en seguida d’una ordonança de 1766. Ara lo Conselh Representatiu de las Associacions Negras (CRAN) e lo CO-10 Mai an lançat un apèl contra aquel drapèl. Lo CRAN e lo CO-10 Mai bandisson lor crida amb lo sosten de las personalitats eminentas de Martinica per demandar al president de la Collectivitat de Martinica, al prefècte e a la ministra francesa de l’Otramar que remplacen « lo drapèl de la vergonha » pel « drapèl de la dignitat ». Lo CRAN trabalha per las reparacions en general, e sus la question dels simbòls publics ligats a l’esclavatge en particular, e estima qu’es ora que s’abandone aquela bandièra esclavatgista. En mai d’aquò, considèra qu’aquel drapèl es pas jamai estat ratificat pels martiniqueses ni mai per la Republica Francesa. Per ansin, l’usatge que ne fan las autoritats en Martinica seriá tant immoral coma illegal e poiriá èsser contestat davant lo tribunal administratiu. Aqueles collectius ramentan que i a un autre drapèl que se creèt en 1968 ; creat dins lo contèxt dels movements anticolonialistas de Martinica, lèu se’n festejarà lo cinquanten anniversari. Sas colors, lo roge, lo negre e e lo verd, remembran los nombroses drapèls de las Antilhas e de qualques païses africans. Aquel drapèl lo fan servir plusors sindicats, partits, associacions e intellectuals. La crida es bandida mentre que dins tot l’estat francés se debat suls simbòls ligats a Colbert dins l’espaci public. Aquel ministre de Loís XIV organizèt, de França estant, lo comèrci colonial restacat a l’esclavatgisme e foguèt l’autor de la primièra version del Còde Negre.

Campanha contra la memòria dels escalvatgistas

Lo 12 d’agost passat, una femna de 32 ans, Heather Heyer, foguèt assassinada per un jove faissista, perque aquesta protestava contra una manifestacion de l’extrèma drecha estatsunidenca, dobèrtament supremacista blanca. Los manifestants supremacistas passavan per carrièras perque refusavan que la municipalitat levèsse l’estatua del general Robert E. Lee, un dels caps de la revòlta dels estats sudistas confederats contra la volontat dels estats del nòrd d’abolir l’esclavatge dels afroamericans. En respondent al President francés, Emmanuel Macron, que declarava son supòrt « als que luchan contra lo racisme e la xenofobia », lo Conselh Representatiu dels Associacions Negras (CRAN) prepausèt lo 23 d’agost que se levèsse tanben dins l’Estat francés los noms de carrièras o d’establiments escolars e los monuments que rendon omenatge a las personalitats qu’organizèron o participèron activament a la Tracha dels Negres, lo trafec que deportèt de populacions d’Africa per que foguèsson esplechadas coma esclaus en America e dins las colònias europèas. En lor plaça, suggerisson que se remembre las personalitats de totas originas que se consagrèron a luchar contra lo racisme e l’esclavatge. Entre los negrièrs e esclavatgistas, lo CRAN ataca en particular Colbert, lo ministre de Loís XIV que, cèrtas, autorizèt lo Canal de las Doas Mars imaginat per Pèire-Pau Riquet, mas que tanben organizèt, de França estant, lo comèrci colonial restacat a l’esclavatgisme e foguèt l’autor de la primièra version del Còde Negre. Aqueste codificava e assajava de justificar per las colònias francesas l’umilianta condicion de las populacions negras asservidas, privadas dels dreches umans mai fondamentals.

En Occitània tanben se rend omenatge als negrièrs e esclavatgistas

Segon Louis-Georges Tin, l’intellectual martiniqués president del CRAN contactat per un redactor de Jornalet, tres vilas occitanas rendon omenatge a Colbert e a d’autres esclavatgistas e negrièrs. I a una Carrièra Colbert a Tolosa, una autra a Marselha, que tanben a un licèu professional Colbert e una carrièra que se recòrda d’un negrièr, Jòrdi Ros [Georges Roux]. De segur, es mai que mai Bordèu, que profechèt durant de sègles del trafec dels esclaus negres, que sembla d’onorar la memòria d’aquela trista epòca ; d’efièch, lo CRAN compta 24 noms de carrièras, corses, plaças o passatges consagrats a las personas que s’enriquiguèron del patiment de millions de negres africans. Entre los negrièrs e esclavatgistas, lo CRAN ataca en particular Colbert, lo ministre de Loís XIV qu’organizèt, de França estant, lo comèrci colonial restacat a l’esclavatgisme e foguèt l’autor de la primièra version del Còde Negre.

Ferriòl Macip

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+