Uei : 16/10/2018

179 collegians bascos penalizats

Dimèrcs 4 de julhet, parents d’escolans e ensenhaires que manifestèn davant lo Rectorat de Bordèu entà protestar contra la non-evaluacion de las copias scientificas deu brevet redigidas en basco. Que vienen de las tresaus generaus e professionaus de quate collègis Ikastola de Ciboure, Camboles-bains, Larceveau-Arros-Cibits e Baiona. Cap a 179 collegians que son actuaument penalizats per aver rendut la lor espròva en euskara, los correctors avent recebut la consigna de non pas corregir las partidas redigidas en lenga. Ger matin, lo rectorat que redigí un comunicat dens lo quau rapèra aver aplicat lo reglament : « pas sonque las espròvas d’istòria-geografia e ensenhament morau e civic e pòden estar redigidas en lenga viva regionau.  » En 2017, lo Rectorat qu’avè procedit a ua derogacion « excepcionau » en acceptar de har notar las copias escriutas en lenga basca tà l’espròva de sciéncia. La federacion de las escòlas immersivas en lenga basca, SEASKA, qu’apèra a un navèth acamp lo 28 de julhet au moment deu passatge deu Tour de France en Bascoat.

 

Lo Conselh regionau de Navèra-Aquitania que publiquè un comunicat entà declarar oficiaument lo son sostien a l'associacion SEASKA dens la soa protèsta contra la non-presa en compte de las copias deu Brevet deus collegians : « La reconeishença de las lengas regionaus qu'ei au centre deu projècte de la Region que la hica en òbra dab los actors, las associacions e dens un dialòg bastit despuish bèra pausa dab lo Rectorat. Qu'ei donc important que los objectius comuns sian respectats e que purmèr, los collegians non sian pas penalizats », çò escriu la conselhèra regionau de Navèra-Aquitania en carga de las lengas regionaus, Charline Claveau-Abbadie. La Region que rapèra la declaracion deu President de la Republica deu 21 de junh passat a Quimper : « las lengas regionaus que jògan lo lor ròtle dens l'enradigament qui hè la fòrça de las regions. Qu'anam perennizar lo lor ensenhament ». « Los hèits que son capborruts e non deverén pas contradíser aquera posicion en l'ahar de quauques dias, tant dens la mesa en òbra deus acòrds en cors, capvath convencions passadas enter las collectivitats e l'Educacion nacionau, que dens los projèctes de refòrma », çò concludeish. Ahar de seguir.

Fòto : Captura video Youtube Stéphane Klein

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+