Uei : 21/04/2018

Setmana pòrtas obèrtas dens las Calandretas de Bearn

Ger, la Federacion departamentau deus Pirenèus-Atlantics Calandreta que presentè lo programa de las pòrtas alandadas de las escòlas immersivas deu Bearn, a l'Ostau Bearnés, maison de las associacions de Pau. Deu 26 au 31 de març, que poderatz assistir a classas dens las 11 Calandretas e lo Collègi Calandreta de Gasconha e encontrar a las equipas pedagogicas entà v'informar sus la vita escolara dens los establiments regits per la pedagogia Freinet. Aquesta qu'ei fondada sus l'expression libra deus mainatges e favoriza l'autonomia deu mainat e la vita en grop.

Bearn que compta 11 establiments Calandreta e 1 Collègi Calandreta. Qu'èran estats tocats a la rentrada passada per la miaça de la supression deus contractes ajudats -a qui arcastavam la lor non-eficacitat contra lo caumatge-. Los contractes ajudats que son d'ara enlà remplaçat peu PEC. Lo PEC, Parcors Emplec Competéncias, qu'ei un navèth contracte d'insercion, reservat au sector non-mercadèr. Los emplegats que seràn seguits de manièra intensa sus l'aquisicion de las competéncias e los emplegaires qu'averàn obligacions precisas e controladas.

L'escòla Drin a Drin, Calandreta d'Espuei (Èst de Pau), qu'a hèit la soa purmèra rentrada. Uei lo dia 4 mainatges qu'i segueishen los cors en lenga occitana. « Qu'èm estats contactats tot au long de l'annada per pairs qui èran interessats peu sistèma educatiu. Pensi pas qu'auram problèmas d'inscripcions a la rentrada de 2018, ua paur qu'avèvam quan avem obèrt l'escòla dab quauques desistiments. Los pairs que'ns pòden viéner encontrar cada matin deus diluns 26, dimars 27, dijaus 29 e divés 30 de març sus rendetz-ve entà visitar l'escòla, encontrar los calandrons e observar la vita de classa », çò expliquè Jordi Hostein, president de l'APE (associacion deus pairs d'escolans).

Inf. : Calandreta Espuei, chemin du Moulin — 64420 Espuei — Tel. : 09 62 57 79 56/06 81 56 28 19  ; This email address is being protected from spambots. You need JavaScript enabled to view it. ; www.calandreta-espoey.fr

IMG 4865

Fòto : Marion Berducq, animatora culturau de la Federacion departamentau 64 Calandreta e Daniel Barneix, President de la Federacion departamentau 64 Calandreta. (La Setmana)

La Calandreta d'Ortès qu'arcuelherà tanben los pairs curiós pendent la setmana. Cada dia de 9 òras a 17 òras 30. Que'vs podetz presentar shens rendetz-vs. Uei lo dia, 40 mainatges que son inscriuts dens l'escòla immersiva. Los efectius de l'escòla occitana d'Ortès qu'an tendéncia a aumentar e la question de locaus adequat que's pausa a cada rentrada, com per la màger part de las escòlas Calandreta. La Calandreta qu'ei tres salas e ua quatau, sala de jòc dens la quau cada matin, los calandrons e s'arretròban entà contar çò qu'an hèit de nau despuish lo dia abans.

Inf. : Calandreta Ortès, baloard Charles de Gaulle, 64300 Ortès — Tel. : 09 62 24 50 67 — Site : www.calandreta-orthez.fr — Mèl : This email address is being protected from spambots. You need JavaScript enabled to view it. 

 IMG 4866

Fòto : Adeline Gonzalez, co-Presidenta de la Calandreta d'Ortès, Jordi Hostein, President de l'APE de la Calandreta d'Espuei, Marie-Pierre Baylocq, Cap d'establiment deu Collègi Calandreta de Gasconha e Brigitte Vergez, Presidenta deu Collègi Calandreta. (La Setmana)

Lo Collègi Calandreta de Gasconha que participa tanben a las pòrtas alandadas. Ua aumentacion deus efectius de 26 % qu'ei estada constatada a la rentrada de seteme de 2017. Los gavidaires qu'an per objectiu d'aténher lo nombre de 80 collegians d'ací 2020. Aqueth objectiu qu'ei fixat en préner en compte la volontat de crear un internat entà poder arcuélher eslhèvas deu Bearn sancèr.

Marie-Pierre Baylocq, cap d'establiment que presenta lo programa de las pòrtas alandadas au Collègi Calandreta de Gasconha e que'ns digó mei sus l'actualitat deu collègi e las collaboracions qui's desvolopan enter los collegians e los media occitans : entervista audio.

Inf. : 9, arrua André Maginot — 64011 PAU — Tel. : 05 59 82 12 93 Site : www.collegipau.fr — Informacions programa sancèr de las pòrtas alandadas : www.calandreta-bearn.org — FB : Calandreta.Bearn — Tel. : 05 59 68 68 73 — Mèl : This email address is being protected from spambots. You need JavaScript enabled to view it. 

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+