Uei : 19/06/2018

Pedagogia Montessori : ua escòla bilingua a Soston tà 2018

La pedagogia Montessori qu’ei un metòde d’educacion qui estó creat en 1907 per Maria Montessori. La mira qu’ei de tribalhar dab lo mainatge dens los sons periòdes « sensibles », « moments de la vita deu mainat on aqueth ei sancerament absorbit per ua sensibilitat a un element precís de l’environament ».

Segon Maria Montessori, si lo mainatge ei ajudat ad aqueth quite moment, l’aprenedissatge que’s hè en pregondor. Mes si lo mainatge non tròba pas los elements qui responen au son besonh deu moment, la sensibilitat s’anosirà progressivament. La pedagogia Montessori que favoriza tanben l’autonomia deu mainatge. Aquesta pedagogia alternativa qu’a atirat l’atencion de Lucia Albert e de Didier Tousis de Pit Produccion, ua estructura qui òbra au desvolopament de las practicas artisticas, culturaus e lingüisticas occitanas suu territòri landés e aquitan. Que sostieneràn l’associacion Escòla Nidau tà l’obertura de la lor escòla per la rentrada de 2018 a Soston (40). La purmèra amassada publica que’s debanè lo 27 de genèr a Soston.

« L’idea qu’ei de crear ua escòla alternativa e bilingua en occitan-gascon. Qu’am espiat e cercat mantuns camins. Qu’am pensat a Calandreta mes n’estó pas possible per rasons tecnicas e politicas ligadas a las Lanas. Fin finala, qu’am causit la pedagogia Montessori. Lo bilingüisme que serà quauquarren de mei. Tres educators que tribalharàn dens l’escòla. Qu’ei lo purmèr còp que la pedagogia Montessori e serà adaptada au bilingüisme. Qu’ei de tota faiçon dens la continuitat de çò que perpausa la pedagogia, l’observacion, la natura, la realitat, lo patrimòni, lo gascon, tot aquò que va dab », çò digó Didier Tousis. Un 70at de personas qu’estón presentas a l’amassada e au cap de l’encontre, 7 mainatges qu’estón inscriuts.

nf. : Escòla Nidau, 73 rota de l’aérodrome 40140 Soston — site : www.ecolenidau.fr — Tel. : 06 99 51 79 07.

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+