Uei : 13/12/2017

Vòlon pas mai aplicar la règla « del masculin que l'empòrta sul femenin »

Lo 7 de novembre passat, lo site Slate publiquèt una tribuna signada per 314 membres del còs professoral de totes nivèls e totes publics qu'ensenhan la lenga francesa. Aqueles s'engatjan a pas mai ensenhar la règla de gramatica que dicta que lo masculin l'empòrta sul femenin. Qu'invòcan tres rasons per aquela decision : la primièra es que « la règla es recenta dins l'istòria de la lenga francesa e es pas necessària. Foguèt mesa al punt al sègle XVIIn. Abans, los acòrds se fasián segon la volontat de cadun.a, com èra lo cas en latin e com es sovent lo cas dins las autras lengas romanas ». A l'epòca, l'acòrd de « proximitat » èra emplegat.
La segonda rason es que d'aprèp aqueles ensenhaires, aquela novèla règla n'aviá pas un objectiu lingüistic mas politic. L'explican amb una citacion de Nicolas Beauzée qu'es l'autor d'una Gramatica generala (1767) : « Lo masculin es reputat mai nòble que lo femenin a causa de la superioritat del mascle sus la femèla ».


La tresena rason pel cambiament d'ensenhament es que la luta contra los esterotipes del genre es essenciala pel progrès de l'egalitat de las femnas e dels òmes e es pas la solucion mai bona de contunhar de repetir aquela formula aus dròlles.
Los 314 membres del còs ensenhaire demandan a çò que siá d'ara enlà ensenhada la règla de « proximitat » o « l'acòrd de majoritat », apèlan lo Ministèri de l'Educacion nacionala a donar als personals e als dels establiments jos sa tutèla, d'instruccions precisas que van dins lo meteis sens. Apèlan tanben las professionalas e los professionals de la premsa e de l'edicion, los correctors e correctoras, las escrivanas e los escrivans atal com las ciutadanas e los ciutadans francofònes, a far la meteissa causa.

Lo ministre de l'Educacion, Jean-Michel Blanquer faguèt un discors sus la question de l'escritura inclusiva a l'Assemblada nacionala lo 15 de novembre passat.

Una deputada MoDem denoncièt l'iniciativa dels 314 ensenhaires que « s'afranquisson de las règlas codificadas per l'Academia francesa e ensenhan d'autras règlas fondadas sus lors conviccions personalas ».

Lo ministre de l'Educacion nacionala declarèt voler defendre la lenga francesa, e que quitament se l'emblèma de França es une femna e qu'avèm fòrça de mots femenins que son importants com « Republica », cal ça que la demorar « vigilants per qu'i aja sonque una gramatica, coma i a qu'una lenga, una Republica ».

Fòto : extrach d'un manual de gramatica

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+