Uei : 18/10/2017

Navèra votz dens « Meitat chen meitat porc »

Despuish lo 3 de seteme, los ahuecats de l’emission « Meitat Chen Meitat Porc » qu’an avut la suspresa d’enténer ua navèra votz au micrò. Lo Nicolas Peuch qu’acompanha d’ara enlà Joan Pau Verdier dens l’emission setmanèra vaduda culta. Musicaire (acordeonista), Nicolas qu’a tostemps escotat l’emission e qui estó quitament convidat en mei d’ua ocasion aquestas darrèras annadas. Que remplaça donc lo Martial Peyrouny : « préner “ la plaça de Peyrouny ” n’ei pas un petit ahar ! Que copresentava l’emission pendent mei de 20 ans, mes ne miam pas las medishas causas. Jo que soi meilèu centrat suus mèdias de uei lo dia e sus la musica, eth qu’èra mei concentrat suu costat escolar », çò nse digó Nicolas. L’ancian acolite de Joan Pau Verdier que conselhè lo joen animator abans de començar la soa purmèra emission, « pr’amor qu’ei ua grana responsabilitat de parlar sus un mèdia màger com France Bleu Périgord, mes qu’ei tostemps dab jo entà’m conselhar ».

Curiós de natura, n’estó pas un problèma de vàder jornalista/animator tau Nicolas Peuch. Que s’interèssa hèra au monde e qu’animava dejà ua emission (« Made in aqui ») 7 ans a sus ua ràdio associativa de Bergerac, Ràdio Orion, çò qu’explica lo hèit que sia pro adaise a l’antena. Lo duo navèth que tribalha amassa au programa de las emissions, en cercar convidats e musicas amassa. Qu’enregistraràn ua emission especiau a la hèira mustra de Peireguers on l’associacion Lo Bornat Dau Perigord serà presenta. Que parlaràn deus mestièrs ancians e deu tribalh que horneish l’associacion tot au long de l’annada. Lo 7 d’octobre, « Meitat Chen Meitat Porc » que serà au concèrt deu grop los Caps Negues a Peireguers tà l’eveniment Cabaret òc. Nicolas qu’a creat ua cronica « Paraulas d’aquí » on tracta de subjèctes de la vita vitanta. Cada mes, lo subjècte que serà diferent e armat deu son enregistrader, qu’anarà a l’encontre deu monde tà’us har parlar deu tèma deu mes. Lo mes de seteme qu’ei consacrat plan segur a la rentrada ! Nicolas que vòu desvolopar la preséncia de l’emission suus hialats sociaus : « que vòi véder que lo monde escoten mei anar mei lo podcast de l’emission suu site de France Bleu. Qu’ei ua escadença qu’avem d’estar present sus un gran mèdia, entad aquò que cau har la promocion de l’emission e que vòi seguir l’evolucion de la ràdio en hicar videos e entervistas pertot… » L’emission « Meitat Chen Meitat Porc » qu’ei cada dimenge de 11 òras a 12 òras.

Inf. : Arretrobatz los podcasts sus https://www.francebleu.fr/emissions/meitat-chen-meitat-porc/perigord

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+