Lo setmanièr occitan

Un projècte d'arrestat tà la refòrma deu Collègi

Un an arron la mesa en plaça de la refòrma deu Collègi de Najat Vallaud-Belkacem, anciana ministra de l'Educacion nacionau, un projècte d'arrestat que torna sus uns punts de la refòrma. 
Ua de las modificacions perpausadas qu'ei la promessa d'ua opcion de latin ahortit en classas de 4au e de 3au. Los escolans qu'averàn 3 òras per setmana contra 2 òras uei lo dia. L'arrestat que mia ua proposicion de restabliment de las classas bilinguas. Atau, cors d'ua dusau lenga que poderàn estar seguits a comptar de la 6au, 2 òras per setmana. L'introduccion d'ua lenga viva ahortida a comptar de la 5au qu'i ei tanben perpausada. Lo projècte d'arrestat de la refòrma que perpausa tanben la supression deu quadre nacionau fixat per l'Acompanhament Personalizat (AP) e los Ensenhaments Practics Interdisciplinaris (EPI). Los ensenhaires que poderàn ensenhar sia los dus o sonque un deus dus, dab la navèra libertat de causir lo tèma deus EPI. 

La FELCO, Federacion deus ensenhaires de lenga e de cultura d'òc, qu'escrivó ua letra, signada peu son president Yan Lespoux, au Ministèri de l'Educacion nacionau « tà qu'aquera navèra refòrma non sia pas ua navèra ataca contra las lengas regionaus ». Dens la letra, la Federacion que hè tres remarcas : « la refòrma deu collègi portada peu govèrn passat que fragilizè los ensenhaments de lengas regionaus ». La FELCO qu'obtienó la creacion d'ua circulara (2017-072 deu 12 d'abriu de 2017) relativa a l'ensenhament de las lengas e culturas regionaus tà qu'un tèxte clar enquadre l'ensenhement au collègi e que'n permétia la continuitat e lo desvolopament. Totun, que cranhen que lo projècte d'arrestat non represente un recul respècte a la circulara. « Sus l'ensenhament facultatiu en 6au purmèr, pr'amor que non preved pas mei qu'un ensenhament d'ua òra maxímum contra duas dens la circulara. L'article 5 qu'introduseish atau ua inegalitat enter las lengas vivas estangèras […] a las quaus lo tèxte acòrda duas òras, e las lengas regionaus ». La dusau remarca de la FELCO que pertòca l'ensenhament de las disciplinas non-lingüisticas (DNL) : « L'article 3 non menciona pas clarament la possibilitat d'un ensenhament en lenga regionau. […] l'abséncia d'aquera mencion que'ns hè crànher ua interpretacion estreta deus tèxtes dens uns establiments ». Fin finala, l'article 5 deu projècte d'arrestat qu'afirma qu'ua « dotacion especifica e pòt estar atribuida aus ensenhaments facultatius », la Federacion de las associacions academicas d'ensenhaires d'occitan que's regaudeish d'aqueth progrès, totun, que l'agradaré d'espandir aquera possibilitat a las cordèras bilinguas autant tà l'ensenhament de la lenga com tà l'ensenhament en Disciplina Non-Lingüistica. 

Lo navèth projècte arrestat qu'estó presentat aus sindicats dimars passat e en conselh superior de l'Educacion uei lo dia. 

 


Écrit par La Setmana le jeudi juin 8, 2017
Category: news - Tags: felco, ensenhament, lenga, regionau, occitan, collegi, educacion, nacionau, najat

« Prèmi Jan Moreu tà la Calandreta de Tarba - Somari de La Setmana n° 1078 »