Lo setmanièr occitan

Un empont mei e ua moneda pròpia a l'Estivada 2017

L'edicion 2017 de l'Estivada de Rodés qu'anima la vila occitana deu 20 au 22 de julhet dab concèrts, deambulacions, animacions taus mainatges, espectacles, cinema, conferéncias e danças. Un centenat de benevòles que tribalhan a la realizacion deu hestenau, aus quaus s'ajustan un quarantenat d'agents e de salariats qui preparan l'eveniment despuish 6 mes.

Un empont mei au bèth miei deu site dedicat a la restauracion. Ua nautat augan, concèrts e espectacles que s'i debanaràn acerà dinc a 20 ò 30 abans que lo gran empont ne prenga lo relais dab d'autes grops de musica.

Dusau nautat, lo hestenau qu'a creat la soa moneda pròpia, la peceta (1€ = 1 peceta). 

L'Estivada que s'ei aubèrta uei a 14 òras dab la Farandole des enfants de l'esplanada deus Rutènes dinc a la MJC. D'ací 15 òras 30, la MJC qu'arcuelherà l'espectacle de monaquetas « Gargamela » tot en cantas, arríders e plors. L'artista landés Didier Tousis que presentarà lo son espectacle a l'entorn deu son darrèr àlbum « Guiva-Roi » a 16 òras aus Archius Departamentaus. Un passacarrèra qu'ei au programa de 16 ò a 19 ò en còr de vila dab Autbòis de la mar, tropa de musicaires de Lengadòc. 

Lo musicaire Clément Rousse qu'aubrirà lo bal dab lo son repertòri de musicas tradicionaus gasconas mesclat a composicions personaus, a 18 òras sus l'empont Balèti. Lo grop locau l'Escampe que pujarà sus l'empont deu Vilatge deus productors a 19 òras 30. Nadau, hèra esperat sus aquera navèra edicion de l'Estivada, que prenerà plaça sus la Grana Scèna a 21 òras, de qué rabir los incondicionaus deu grop bearnés. L'artista catalan, Cali, que prenerà lo relais a 23 òras entà presentar lo son 7au àlbum au public deu hestenau. 

Doman, projeccion deu filme « Lo hussard sus lo teit » (sostitolat en francés) au Cap Cinéma a 10 ò 30. A comptar de 14 òras, lo grop San Salvador, formacion intergraument vocau qui coneish mei anar mei de succès, que jogarà sus l'empont de la MJC. Hervé Olivier que perpausarà ua conferéncia sus « 1217, l'annada tarribla, 8 sègles a » a 14 òras. 
Un aperitiu literari qu'aubrirà a 18 òras a l'espaci detenta. Lo grop Laüsa que jogarà a la medisha òra (empont Balèti) abans de deishar la plaça au grop PP Prunes (empont vilatge). Los Goulamas'K que haràn bolegar la fola a 21 òras, abans de deishar la plaça au grop Les Motivés a 23 òras.   

Dissabte, qu'ei lo dessenh animat « Paddington » (sostitolat en francés), darrèr sortit en çò de Conta'm, associacion de doblatge en occitan, d'estar projectat au Cap Cinema a 10 ò 30. Lo trio Brotto Lopez Raibaud qu'animarà l'empont Balèti a 18 òras dab la soa musica tradicionau e compausada occitanas. Lo grop Cor de Vigne que jogarà a 19 ò 30 sus l'empont deu Vilatge deus productors. Paban das Baul e Manu Théron que pujaràn sus l'empont a 21 ò, seguit per Lou Dàvi en Dub a 22 ò 30 e Minima Social Club a 00 ò. 

En 2016, l'Estivada qu'èra represa per la mairia de Rodés. Lo bilanç qu'estó mitigat, nombrós occitanistas acostumats qu'avèvan hèit lo mus au lo hestenau e qu'estó au contra mei apreciat peus locaus. 

inf. : http://www.ville-rodez.fr/fr/culture-et-loisirs/estivada/documents/PROG-ESTIVADA2017.pdf


Écrit par La Setmana le jeudi juillet 20, 2017
Category: news - Tags: estivada, occitan, rodés

« Baiona la gascona - Ocfutura e « lo vòte dens los país d'òc » »