Lo setmanièr occitan

Ua ràdio 100 % en lenga bretona lèu a Nantes ?

Radio Kerne qu'estó aviada en 1998. Qu'a la particularitat de non pas sonque difusar programas en lenga bretona. Que perpausa cap a 60 òras d'emissions cada setmana taus grans e petits e un programa variat qui mescla actualitat, reportatges, cronicas e emissions satiricas. Que tòca un auditòri de mei de 50 000 personas, qui saben tanben apreciar la musica difusada per la ràdio. L'equipa de la ràdio, basada a Plonéis (29) que dispausa de frequéncias a Kemper, Kemperle e Douanenez (Finistèrra). Qu'espia cap tà Nantes (Naoned en breton) on existeish ua demanda vertadèra segon las audiéncias enregistradas via lo net e las redifusions d'emissions. 

Radio Kerne qu'organiza ua amassada publica doman a Saint-Herblain (44) au Centre Yezhoù ha Sevenadur, entà presentar lo projècte d'obertura d'ua navèra frequéncia sus Nantes. « La talhucada territoriau actuau dab la region “ País deu Leire » e los sons mèdia locaus calcats dessús (France 3, Ouest-France, …) que'ns hè partir ua fractura mediatica qui empacha la difusion deus programas o articles en lenga bretona en Leire-Atlantic », çò explica l'equipa de la ràdio dens un comunicat. 

La ràdio qu'ei sostienuda per l'Ofici Public de la Lenga Bretona tà la soa accion. Fin de 2017, lo CSA que lançarà un aperet a frequéncias RNT (ràdio numerica terrèstra) suu territòri nantés. La ràdio qu'a besonh lo sostien de las institucions, deu monde associatiu mes tanben deus abitants de la zòna de difusion. « Qu'ei ua possibilitat tecnica de non pas créder qui ns'ei auhèrta, ua oportunitat istorica d'aubrir un mèdia en lenga bretona a l'èst deu país. Ua ràdio associativa qu'ei un utís de terrenh hèra eficaç. Que la podem escotar e plan segur participar-i », çò concludeish l'equipa.

Inf. :  http://www.radiokerne.bzh/

                                  


Écrit par La Setmana le mardi juin 13, 2017
Category: news - Tags: radio, breton, ofici, lenga, cultura, audio, nantes, associatiu, oplb

« Manifestacion crisi aviària —Los neuridors que blòcan actuaument la Nacionau 124 a Aush - Damian Valéro, artista proteïfòrma »