Lo setmanièr occitan

Ua peticion tà la partença deu gavidaire d'Emmaüs Lescar-Pau

En 1949, l'Abat Pierre que creè lo movement Emmaüs, ua organizacion laïca de luta contra l'exclusion. Uei qu'ei presenta dens mei de 40 país capvath lo planeta. Qu'ei l'encontre que l'Abat Pierre hasó dab George, qui'u demandè ajuda, qui possè l'òmi de Glèisa a fondar lo movement de solidaritat.

L'annada de 1954 que coneishó un ivèrn murtrèr taus shens-ostaus. L'Abat Pierre que lancè un aperet sus l'antena de Ràdio-Luxemborg (RTL uei lo dia). L'aperet memorable que miè 500 milions de francs en dons. Dab la moneda, que harà bastir ciutats d'urgéncia, qui per uas, se desvoloparàn en HLM. La luta de l'Abat Pierre que permeterà l'adopcion d'ua lei defenent l'expulsion de logatèrs en periòde ivernau. 

Darrèr cada sala de ventas que demora ua comunautat d'ancians shens-ostaus, tornat baptizar « companhons », qui collectan, trigan e restauran vestits e objèctes. Las comunautats d'Emmaüs que's finançan per la venta de materiaus e d'objèctes de recuperacion e que basteishen lotjaments. 

Dètz ans arron la mort deu son creator, Emmaüs que ved lo son imatge lordejat per ahars e escandales a còps estofats per las hautas instànças. Aquestas darrèras annadas, las publicacions suus « ahars d'Emmaüs » que's multiplican, suus hialats sociaus. Maishants tractaments, faussas acusacions miant a l'expulsion de companhons, loguèrs indecents e que'n passam. 

La comunautat deu vilatge d'Emmaüs Lescar-Pau que s'arretròba sovent au bèth miei d'aqueras acusacions, mei que mei lo son gavidaire, Germain Sarhy. Las soas derivas autoritàrias qu'estón dejà estadas denonciadas peu passat : en 2005, l'adjunta a la mairia de Pau, cargada de seguir la Comunautat Emmaüs qu'adrecè ua letra a Emmaüs França en la quau descriu lo son constat sus la vita comunautària en la lor maison bearnesa, « Los rapòrts dab los companhons que son brutaus, e lhèu fisics ». Martin Hirsch, president d'Emmaüs França a l'epòca que comandè un audit sus la comunautat. L'audit qu'ei disponible enqüèra uei lo dia. Lo sénher Sarhy que pòt demorar tranquille, quitament se lo rendut-compte ei atucant, despuish arren n'estó hèit. 

Despuish dus mes, David Cruz, ancian companhon deu vilatge, qu'a hicat en linha ua peticion « tà la partença deu gavidaire d'Emmaüs Lescar-Pau ». Que denóncia l'expulsion de personas « pr'amor pas o pas mei productivas », e l'arrefús de tot arrèst malaudia, e d'ajustar : « los dias de repaus, los companhons que son obligats de har tribalhs collectius jos pena d'expulsion immediata ». 

A l'òra quan escrivem aquera braca, 294 personas que sostienen la soa iniciativa. 

Inf. : Captura reportatge de l'emission L'autre JT. 


Écrit par La Setmana le vendredi mai 12, 2017
Category: news - Tags: emmaus, abat, solidaritat, escandale, pau, vilatge

« La 19au edicion de Trad'envie que s'aprèssa - Istòria : lo lion e lo leopard aquitans »