Lo setmanièr occitan

Ua navèra Presidenta a l'OPLO

Qu'èra uei lo dia, lo darrèr dia de presidéncia de Dàvid Grosclaude au cap de l'Ofici Public de la Lenga Occitana. N'estant pas mei elegit regionau (Aquitània), lo bearnés que devó deishar la soa plaça. Charline Claveau-Abbadie que prenó las soas foncions quauquas òras a, acompanhada a la vice-presidéncia per Patric Roux, elegit de la Region Lengadòc-Rosselhon-Mieidia-Pirenèus e per Hélène Bernard, rectora de l'Academia de Tolosa.

                          

« Que dèishi donc aquera presidéncia un còp complit çò de prometut a saber la mesa en plaça d'un organisme public qui averà per sola e unica mira, per sol e unic tribalh, la promocion de la lenga occitana », e lo sénher Grosclaude d'ajustar « Qu'ei un utís politic lingüistic public. Aquò hè de la lenga occitana un vertadèr objècte politic. Que la lenga e sia vaduda un objècte politic n'ei pas navèth […] Mes que duas regions deciden de hicar en plaça un utís comun entà promòver l'occitan qu'an en comun, qu'ei navèth; e que l'Estat s'i associa da la causa enqüèra mei beròja ».

Dens lo son devís, Dàvid Grosclaude que rapèra los chantièrs e las prioritats de tribalh de l'OPLO, com lo desvolopament de l'ensenhament de l'occitan e en occitan en aliança dab Calandreta, o enqüèra l'audiovisuau, los mèdia e lo desvolopament de la preséncia publica de la lenga. E de concludir « L’OPLO que servirà segur a ajudar los actors qui tribalhan en favor de la lenga occitana a progressar en s’amassar, en se pausar questions navèras. Vos tanben, qui representatz las Regions et l’Estat, que seratz acarats a questions navèras e projèctes qui non son pas jamei estats miats dinc adara. Que’vs desiri de tribalhar dab eficacitat e estrambòrd, en aver en cap finalament, qu’avètz aquera escadença de tribalhar sus un sol territòri qui ei la lenga occitana. E d’autes mots que poderem díser “ lo men país qu’ei la lenga ”. Lo país de l’OPLO qu’ei la lenga occitana ».  

La navèra Presidenta de l'OPLO, Charline Claveau-Abbadie, que ns'acordè ua entervista abans la soa nominacion e que'ns partatjè lo son sentit pertocant los dus vectors màgers de la lenga que son l'ensenhament e los mèdia «  Per çò qui ei de l'ensenhament, que i averà lo seguit de la convencion Estats-Region. Qu'ei quauquarren qui arribarà rapidament. L'OPLO que cambiarà las causas. Que poderà estar en carga de la politica lingüistica e de tot çò qui pertòca a la socializacion. La mission “  mèdias  ” ei inclusa dens las missions de l'OPLO. Lo projècte de l'Ofici ei escriut mes adara que calerà discutir de la governança ».


Écrit par La Setmana le mardi mars 22, 2016
Category: news - Tags: oplo, grosclaude, abbadie, roux, politica, lenga, occitan, ensenhament, media

« Resèrva parlamentària : los deputats ajudan pas gaire l'occitan - Patrimòni : cossí far lo site de Montsegur mai atractiu ? »