Lo setmanièr occitan

Total Festum Narbona : omenatge a Leon Còrdas divendres

Lo collectiu cultural erautés Còp-sec trabalha dempuèi un an sus un projècte consacrat al poèta Leon Còrdas (1913-1987). Prepausarà una sesilha de lectura de l'òbra de Còrdas a Narbona dins l'encastre del Total Festum.

Divendres a 18 h 30, a l'auditòri de la mediatèca de Narbona (11), lo Cercle occitan de Narbona, lo Collectiu Còp-sec e Mille Poètes vos prepausa de descobrir lo projècte Leon Còrdas. Es una adaptacion musicala de poèmas extraits del recuèlh « Òbra poëtica ». Dempuèi sa creacion, lo collectiu Còp-Sec òbra pel desvolopament de projèctes artistics e culturals occitanofònes. Recampa d'associacions, d'artistas e de formacions musicalas. 

Aquela serada serà animada per la corala clapassenca del Barrut e los Mille Poètes. Legiràn de tèxtes de Còrdas en occitan e en francés. Poiretz crompar lo CD elaborat pel Collectiu Còp-Sec dins l'encastre del projècte. Lo disc « Lo son d'aquela votz » compren de poèmas de Còrdas meses en musica pels artistas del collectiu atal coma un libret.  

Aquel projècte es l'escasença de tornar editar l'òbra de Leon Còrdas que, fins ara, èra agotabla e se podiá pas mai trobar. Amb aquel bon trabalh complit per Còp-Sec, l'eretatge del poèta-vinhairon de Menerbés serà tornamai accessible. 

Inf. : www.cercle-occitan-narbona.fr

 

 


Écrit par La Setmana le mercredi juin 1, 2016
Category: books - Tags: Cultura, Còrdas, Còp-sec, Narbona, Total, Festum

« Baish-Ador : amassada publica tau grop escolar immersiu de Bocau - Lengadòc : l'emplec torna partir a Montpelhièr e Tolosa »