Lo setmanièr occitan

Tolosa : La Topina, un an après

Farà un an, lo bar tapas associatiu occitan dobrissiá sas pòrtas. Son responsable, l'agenés Florent Salinié, es puslèu content d'aquel primièr aniversari.

« Aquò passa lèu ! » çò nos a dit Florent Salinié. Es puslèu bon signe après un an d'existéncia d'aquel establiment ont es bon de s'anar tornar trobar. Fa un an, l'interrogàvem sus sas aspiracions per aquel lòc novèl, installat al dintre de l'Ostal de Boysson, a la carrièra Malcosinat. « Totes los projèctes se concretizan, çò nos diguèt la velha, ara es vengut un lòc amb d'eveniments cultural, de moments de discutida e tanben de talhièrs ».

Es estada la frucha de nombroses partenariats ligats amb divèrsas associacions o organismes (occitanistas o pas) e s'es soldat per un total actual de 3 200 adesions a « Fasèm de Bruch », associacion gestionària de La Topina. Foguèron tanben nombroses los artistas a passar per aquí se pensam a Laurenç Cavalié, Moussu T e lei Jovents, Djé Balèti o encara Asundar. Aqueste mes, devon venir Papet J e lo Ministèri del Riddim lo 22 d'abril, per la serada festejant lo primièr aniversari de La Topina. Vendrà tanben lo vesin Eric Fraj lo 27 d'abril.

La Topina es pas menada pel sol Florent Salinié. Pòt comptar sus l'apièg de Danís Chapduelh qu'a realizada la carta grafica de l'establiment e elaborada una carta bilingüa, per exemple. Lo trabalh de comunicacion es tanben assegurat pel Romain Brunal (salariat a l'Ostal d'Occitània) atal coma per la societat Komgourou, co-gerida pel Renaud Savy. Se pòt tanben apiejar sus un burèu solide menat per la presidenta Perrine Charteaux e tanben la clavaira Margaux Duffour, engatjada dins l'aventura dempuèi la debuta. Ara la mira es de s'implantar coma cal dins aquel barri de l'ipercentre tolosan. Los escambis se multiplican dins la mira de desvolopar uuna fèsta de quartièr amb los autres comerçants presents dins aquela zòna.

Inf. : http://latopina.com 


Écrit par La Setmana le mardi avril 4, 2017
Category: news - Tags: Cultura, Topina, Tolosa

« Miquèu Berdòt e lo collectatge deu país deu Marsan au Cafè gascon de Dacs (40) - Cronica D'una illa a l'autra — Las illas Salomon, prat batalhièr de la segonda guèrra mondiala »