Lo setmanièr occitan

Tecnologia : peticion per una emoticòna amb lo drapèu basc sus WhatsApp

Un estatjant del País basc sud reclama una emoticòna a las colors de l'ikurrina als desvolopaires de l'aplicacion. 

Harkaitz Galarraga viu dins la banlèga de Donostia e sa demanda es tota simpla : « poiriatz introduire l'emoticòna del drapèu Ikurrina ? ». Aquò vòl dire que los utilizators d'aquela applicacion fòrça populara en cò de la joventut poirián dispausar d'aquela icòna per soslinhar lor prepaus o tot simplament... lor identitat.

Mesa en linha fa una setmana sul site change.org, aquela peticion a ja reculhidas 18 581 signaturas. L'iniciator de la peticion recebèt una responsa la velha dels responsables de l'aplicacion : « nos agrada la vòstra suggestion ! La poirem pas aplicar dins l'immediat mas prenèm en compte las vòstras remarcas, que nos ajuda a fargar un bon produit. S'avètz d'autras questions o retorns, esitetz pas a nos contactar, seriam contents d'ajudar ».

L'aplicacion WhatsApp es un servici de messatjariá disponibla sus smart phone. Los utilizators an la possibilitat de comunicar a l'escrit per de conversacions instantanèas, per SMS e se pòdon quitament telefonar via l'aplicacion. 

 

 


Écrit par La Setmana le vendredi février 17, 2017
Category: life - Tags: Tecnologia, Ikurrina, WhatsApp

« Pau : cap a una senhalizacion trilingüa a l'universitat ? - Pau (64) — Las purmèras Assisas de la Lenga Occitana saludadas per la critica »