Lo setmanièr occitan

Tè Vé Òc, una television que pòrta ben son nom

Tè, Vé, l’Occitan ! Es ben çò que causiguèt de dire la còla d’afogats de la lenga e la cultura occitana quand bastiguèt l’associacion dau meme nom.

L’amira èra, e es totjorn, la vòglia de faire veire e entendre l’occitan dins la vida de l’ora d’ara. Dins lo ròdol de Nimes, i aviá pas gaire de resson occitan a la TV, levat sus l’emission de France 3 : Vaquí. Dins un temps que la lenga es pas gaire parlada o afichada per carrièiras, èra necite de li donar una plaça vertadièira e de la faire viure e avançar.

Dempuèi d’annadas, Lisa Gròs, participava a d’emissions en occitan amb Felip Reig sus Télé Miroir, TV ertziana venguda puèi Télé Bleue, avant de passar a TV Sud. Es doncas naturalament que l’aventura contunhèt amb la creacion d’una « cellule audio visuelle en occitan », coma lo diguèt sa parucion au jornau oficiau en 2012.

Lei benevòls de Tè Vé Òc prenguèron son coratge a doas mans e demarèron amb 1000 € en caissa ! D’ideiós ? Non, pas tant qu’aquò, que tre 2013 fuguèron seguits, puèi ajudats. En 2016 comencèron d’i creire encara mai amb l’emplec d’Amy Cros, JRI, que venguèt menar a l’edifici sei pèiras de qualitat. 

Tè Vé Òc uèi 

Una emission de 13 mn, Lenga d’Òc, es realizada cada setmana. De reportatges son bastits sus d’accions culturalas o economicas menadas dins Gard, Eraut, Bocas de Ròse e dins Occitania granda tota, de còps que i a. Basta de regardar de pròche la tièira deis emissions en podcast sus lo site de Tè Vé Òc per veire la varietat dei tèmas. 

La lenga emplegada es l’occitan provençau, mas cada entrevistat emplega la sieuna. De temps fòrts, coma lei  festenaus an sa plaça tanben.  Aquela emission es difusada sus TV Sud, mantuns còps la setmana, passa tanben sus Occitanica dau CIRDOC, sus FIMOC e Cep d’Òc, sus Youtube, Facebook e sus http://teveoc.e-monsite.com/ evidentament.

Tè Vé Òc prepausa sus son site totei sei produccions (captacions e creacions a la comanda), formacions, accions pedagocicas de creacion de vidèo en collègi  e estagis.

 

Partenariats

Tè Vé Òc a un partenariat privilegiat amb lo CIRDOC qui li comandèt la partida dicha « Entre temps » plaçada en cada fin d’emission e qu’es mesa en valor sus Occitanica.

Una experiéncia novèla demara pendant l’UOE de Nimes : Tè Vé Òc e Ràdio Lenga d’òc van obrar amassa per metre en linha en direct sus Facebook e sei sites, d’entrevistas d’intervenents. Savem ben qu’a l’ora d’ara l’imatge ten fòrça plaça dins l’actualitat, doncas dèu tanben l’aver dins l’actualitat occitana.

De projèctes a bodre per 2018, la represa dau Festenau Rescontre vidèo amator, una enveja de s’investir e de se professionalizar totjorn mai, aquò es evident, mas nòstra capitada passarà de segur per l’ajuda que nos portaràn leis institucions. Podem pas faire de miracles tot solets e cada ajuda es la benvenguda dins de temps dificils !

 

Lisa Gròs

Presidenta de Tè Vé Òc


Écrit par La Setmana le mardi juillet 11, 2017
Category: news - Tags: teveoc, gros, media, mainatge, ensenhament, educacion, lenga, occitan

« Jornada occitana a Malhòrca - Editorial — Las vacanças, totun ! »