Lo setmanièr occitan

Sent Seren (46) — Aumenatge a la poèta lemosina Marcela Delpastre

L'associacion Aquí l'Òc vos convida a una jornada d'omenatge a la granda escrivana e poèta lemosina Marcela Delpastre, dissabte 22 d'abrial, de 17 a 23 oras a l'Espaci Occitan Carcinòl, prèp del Casinò, 60 avenguda Pierre e Andrée Delbos, a Sent Seren (Òlt). Per aquela jornada d’omenatge e de descobèrta, sos ancians amics e biografes se son mobilizats.

  • A 17 oras - Domenja Decomps, professora d’occitan a la retirada e poèta que contribuïguèt bravament a la descobèrta dels talents literaris de Marcela Delpastre dins las annadas mila nòu cent ochanta evocarà per sos sovenirs e la lectura d’una causida de tèxtes en occitan e en francés sa coneissença prigonda e son grand respècte per l’òbra de la femna que frequentèt pendent prèp de quaranta ans.

  • A 19 oras - I aurà un repais sus reservacion (10 €) al 06 73 62 64 63.

  • A 21 oras - Patrick Cazals, cineasta e fondator dels Films du Genièvre et dels Films du Horla presentarà dos dels films que consacrèt a Marcela Delpastre : Marcelle Delpastre, à fleur de vie et Marcelle, parole. Dins lo primièr, rodat a Germont, se retròba Marcela Delpastre, dins son quotidian, seguissent amb vam son trabalh poetic exigent, marginal, al contacte de la tèrra e de sas intuicions. Analiza son trabalh d’escritura e parla amb umor e conviccion d'aquela recèrca capuda d’una paraula autentica e poderosa a l'entorn de sa tèrra. Dins lo segond film, rodat a l’origina en 35 mm scope e presentat dins las salas en primièra partida del film de Claude Berri « Manon des Sources », Marcela Delpastre capita de traduire amb sobrietat lo trabalh e las emocions d'un escrivan ferotjament ligat a sa ruralitat e a son environament. 
    Pendent aquela jornada del dissabte 22 d'abrial, serà possible de retrobar lo percors estonant de Marcela Delpastre, mercé a la mòstra que li es consacrada, prestada per la Bibliotèca Multimedià de Lemòtges e que serà visibla del 18 d'abrial au 22 de mai lo dimècres e lo dissabte de 15 oras a 18 oras a l'Espaci Occitan Carcinòl a Sent Seren, de partejar un repais sus plaça e de rencontrar los organizators e intervenents.

Inf. : Associacion AQUÍ L'ÒC, 204, carrièra del general Ambert 46 400 SENT SEREN — Tel. : 06 73 62 64 63 — Corric : aqui.loc@laposte.net — Site : www.espacioccitancarcinol.com

 


Écrit par La Setmana le mardi avril 18, 2017
Category: news - Tags: literatura, aqui, delpastre, occitan, lenga, cultura, seren

« Catalonha : un sindicat denóncia la manca de promocion de l'occitan - Rentrada 2017 — L'Ikastola que s'installa a Bocau (64), Calandreta que passa a costat deu projècte »