Lo setmanièr occitan

Retrait de Nathalie Marty « Dempuèu Roergue fins a Cantal »

Aquela avaironesa es la novèla gerenta de la SCOP artistica Sirventès, basada a Orlhac. Remplaça Bernat Giacomo, partit recentament a la retirada.

Es pas una galejada. Dempuèi lo primièr d’abril, la cooperativa Sirventès basada a Orlhac (Auvèrnha) s’es mudada. L’agéncia artistica, a la punta dins l’acompanhament de projèctes artistics en occitan, an desirat lo bon astre a sos fondaires Marie-Pierre Estival e Bernat Giacomo, cap a d’aventuras novèlas. L’una ocupava las foncions d’administratritz e l’autre èra gerent. Aqueles dos pòstes foguèron fusionats en un sol.

A la seguida de l’assemblada generala de la SCOP que se tenguèt lo 22 de mars, la geréncia es estada fisada a Nathalie Marty, originària de Vilafranca de Roergue... E la roergata es pas estada paracasudada. « Coneissi plan l’ostal, çò nos a dit, soi totjorn estada en ligam amb Sirventès sus de missions petitas ». Passèt un brave de temps en cò de la companhiá Humani Théâtre, basada a Capestanh (Erau) e tanben en cò de la companhiá Vendavan basada a Tolosa. Mas entre 2004 e 2007, èra encargada dels eveniments en cò de la societat auvernhata.
Aquò vòl dire que s’entrevava de la produccion, de la coordinacion e del seguit dels projèctes artistics. Foguèt sa pòrta d’entrada dins la vida activa après aver obtengut un DESS d’agençament e de desvolopament del territòri. « Ai totjorn aguda l’enveja de prepausar de projèctes exigents, populars e accessibles, çò nos a dit, m’agrada de descobrir la color, l’identitat d’un territòri pr’amor un territòri se desvolopa a partir de çò qu’es ». Tant val de dire qu’amb Sirventès, a tota latitud per çò far.

Periòde de transicion
Es en decembre de 2016 que foguèt sollicitada per prendre lo relais. Los cooperators li indiquèron que cercavan qualqu’un dins la mira de la partença a la retirada de Bernat Giacomo e de la partença tot cort de Marie-Pierre Estival. Dempuèi lo mes de genièr, fa lo vira e vai t’en entre Avairon e Cantal dos jorns per setmana per assegurar la transicion.
Faguèt aquela escomesa amb estrambòrd, « onorada » d’aver tan de responsabilitats dins una societat que ditz « importanta » per desvolopar l’espectacle viu en occitan o l’espectacle viu, tot cort. En chifras, aquò dona 6 emplecs equivalents temps plen, 17 artistas acompanhats o encara 13 albums produits pel labèl musical creat en 2007. Aquò dona encara mai de 2 000 datas vendudas en 10 ans a travèrs Euròpa tota (França, Espanha, Belgica, Olanda, Portugal o encara Itàlia) atal coma mai de 100 eveniments concebuts dins una vintena de departaments.

Enfin, Sirventès a tanben realizadas mai de 50 estudis, DLAs e audits culturals e economics dins l’exagòn. Dins son catalòg d’artistas, Sirventès ten entre autres La Mal Coiffée, Du Bartàs, Marie Coumes, Laurenç Cavalié, Ives Durand, Monica Burg, Séverine Sarrias, Arnaud Cance o encara Florant Mercadier. Son d’artistas o de grops plan coneguts dels amators de musica o d’espectacles de contes en occitan... e dels autres !

Accentuar l’acompanhament artistic
Aquò fa qu’aquel estrambòrd de la novèla gerenta es tanben mesclat de prudéncia pr’amor a plan consciéncia dels enjòcs. « Çò de rassegurant respècte a aquò... es qu’es una SCOP, çò nos a dit Nathalie Marty, se compausa d’una trentena d’associats que son de personas presentas e investidas. Soi pas soleta ! ». Pel moment, assegura la represa del trabalh administratiu en prenent coneissença dels dossièrs en cors de tractament. Per çò qu’es de las orientacions futuras de la SCOP, l’Assemblada generala a causit d’accentuar lo trabalh d’acompanhament dels artistas. Bernat Giacomo desvolopèt el tot un fais de servicis dins l’expertisa territoriala amb especialament de Dispositius Locals d’Acompanhament (DLA) en direccion de las collectivitats. Sembla qu’aquela activitat seriá mesa en pausa pel moment. Sirventès tornariá alavetz a son còr de mestièr ? « Pas vertadièrament, çò nos a dit Nathalie Marty, se prenèm las sollicitacions ligadas per exemple als DLAs, Sirventès es venguda una estructura fòrça identificada e reconeguda. Nos poiriam apiejar sus de partenariats amb d’autras estructuras per contunhar de prepausar aquel servici ». Amb l’arribada de Nathalie Marty a la geréncia, los cooperators an decidit de far beneficiar lor societat d’un ancoratge doble per far lo ligam entre Lengadòc naut e Auvèrnha. Una antena de Sirventès serà dobèrta a Severac del Castèl, ont viu justament la gerenta !

Novetats per la davalada !
En esperant, son tot un fais de projèctes que son en cors de boclatge d’aquesta passa. Espeliràn normalament per la davalada de 2017. Primièr, cal far virar lo « Moko Balèti » del Djé Balèti (La Setmana, n°1068) dont l’album ven de sortir. Tanben, sul burèu de Nathalie Marty, poiriam trobar lo dossièr tocant al novèl album de La Mal Coiffée. An trabalhat lor repertòri novèl e s’inspirant de tèxtes de l’escrivan, poèta, dramaturg e psicanalista bèlga Henri Bauchau. L’album se dirà « E los leons ». Dins un autre registre, Arnaud Cance e Séverine Sarrias an creat l’espectacle « Pomme / Poma » destinat als manhaguets. Se poirà adreçar a d’enfantonets de tres ans o alara, s’adaptar a de mainatges mai grands segon los cases. Après sos famoses « contes del placard », Florant Mercadièr prepausarà un espectacle novèl titolat « l’Occitània pels nullasses » ... Vos poiretz atal far explicar los fondamentals de la cultura nòstra a partir del mes d’octobre. Enfin, l’incansable Laurenç Cavalié trabalha sus un segond espectacle solo que se basariá sus una bona part d’improvizacion. Compte tengut de la qualitat del trabalh d’acompanhament dels artistas per Sirventès dempuèi sa creacion (primièr coma associacion) en 1996, nos podèm esperar clarament a de creacions plan engimbradas. Dempuèi son quartièr general de Severac, Nathalie Marty pòt pas esperar de las veire arribar concrètament sus l’empont, en escota suls ordenadors o dins los salons o alara dins l’ambient convivial d’una serada al canton. Aquel sentiment es largament partejat.

Inf. : www.sirventes.com 


Écrit par La Setmana le vendredi avril 21, 2017
Category: news - Tags: marty, sirventes, cultura, musica, dubartas, brotto, lopez, mal, coiffée

- Condes deu parçan baionés »