Lo setmanièr occitan

Rentrada 2017 — L'Ikastola que s'installa a Bocau (64), Calandreta que passa a costat deu projècte

Que'n parlavam au moment de las duas amassadas organizadas per la Federacion departamentau de las Calandretas (64) e per SEASKA, la federacion de las escòlas bascas Ikastola. Lo projècte de creacion d'un «  grop escolar » en immersion en lengas regionaus a Bocau (au ras de Tarnòs e Baiona) que vien d'estar validat... shens la partida Calandreta.

« A maugrat » de las duas amassadas d'informacion e ua distribucion de paperòts au moment d'un concèrt de Nadau dens lo parçan, las associacions culturaus occitanas a l'entorn ne s'escadón pas a atirar familhas tà las inscripcions.

Francis Gonzalez qu'avè insistit tà qu'ua Calandreta e viengosse installà's dab l'Ikastola. La federacion basca que contactè en purmèr lo maire de Bocau tà la creacion de l'ikastola en tèrras istoricament gasconas. Conscient de l'istòria de la soa vila, lo sénher Gonzalez qu'avè anonciat que l'ikastola ne's haré pas shens la calandreta, en véder l'escaduda deu projècte costat basco (mei de 15 familhas interessadas contra 1 tà la Calandreta), que devó resignà's.

Que confirmè la novèla lo 12 d'abriu en acamp public : « La municipalitat que decidí d'acompanhar lo projècte de creacion d'ua ikastola a Bocau ».

La classa de petita seccion que s'aubrirà a la rentrada de 2017 en los locaus destrusits per un huec au mes d'agost, lo Vigo, arrua Raymond-et-Marcel Glize.

Christophe Martin, conselhèr PS a la mairia de Bocau, que's regaudí de l'obertura d'ua ikastola en la soa vila, totun que raperè : « la responsabilitat municipau que pòrta purmèr sus l'auhèrta de l'ensenhament public ». Grops d'oposicion (PCF, Changeons Boucau e PS) que declarèn redobtar las consequéncias de l'obertura d'ua escòla immersiva en lenga regionau taus efectius de l'escòla publica « dab un risc de barradura de classa ». Que demandan que l'aprenedissatge de las lengas regionaus e's hàcia en classas bilinguas de l'ensenhament public.


Écrit par La Setmana le mardi avril 18, 2017
Category: news - Tags: ikastola, calandreta, bilingua, ensenhament, bocau

« Sent Seren (46) — Aumenatge a la poèta lemosina Marcela Delpastre - Acamp gara Pau — Non tòques pas a la mea Paloma Blua »