Lo setmanièr occitan

Region ARA — Ua borsa au merit arrefusada per liceans

Ger, lo jornau en linha Médiacités que publiquè ua tribuna signada d'un collectiu compausat d'un detzenat de liceans deu licèu Antoine de Saint-Exupéry de la vila de Lion. 

Que s'engatjan a tornar balhar los 500 euros de la borsa versada peu conselh regionau d'Auvèrnhe-Ròse-Aups, per cas d'obtencion de la mencion « Hèra plan » au bachelierat. Los joens qu'estiman la situacion « injusta ».

Dens la lor tribuna, qu'arcastan tanben a la Region de desengatjà's deu sector associatiu despuish la victòria de la dreta a las eleccions regionaus. Que soslinhan la fragilitat creishenta de las associacions per aquestes torns. « Que consideram qu'aquera moneda n'ei pas la nosta puish a que n'avem mensh lo besonh que d'autes. Qu'avem decidit de tornar versar los 500 euros que ns'acordaratz a ua associacion d'interès generau ». Segon los membres deu collectiu, aqueth merit non representa pas forçament lo tribalh hornit peu licean tot au long de l'annada e lo dia de l'examen e ne cau pas que repause sus ua quita mencion. Limitar aquera borsa aus bachelièrs de cordèra generau qu'ei desvalorizant respècte aus escolans de CAP e de diplòmas professionaus.

Lo còsta de la borsa que representaré 3 milions d'euros. Lo collectiu qu'apèra los navèths bachelièrs d'Auvènhe-Ròse-Aups qui receberàn la mencion a'us juntar e a tornar versar aquera borsa que qualifican « d'illegitima » a ua de las nombrosas associacions en « dangèr per la poltiica regionau miada despuish dus ans ».

Tribuna deu collectiu de legir ací

 


Écrit par La Setmana le mercredi juillet 5, 2017
Category: news - Tags: bachelierat, ensenhament, liceans, lion, auvernhe, wauquiez, moneda

« Lo CIRDOC que passa en mòde estiu - Somari de La Setmana n°1080 »