Lo setmanièr occitan

Qwant : Lèu ua version occitana ?

Lo 5 d'abriu passat, lo motor de recèrca Qwant que lancè la soa purmèra version regionau « Qwant.bzh ».

Despuish 2011, Qwant qu'ei ua alternativa francesa a Google. La soa particularitat qu'ei que contràriament a motor de recèrca american, non consèrva pas nada dada deus sons utilizators. Que reïvindica uei lo dia 34 milions de visitaires e 2,6 miliards de requèstas. Lo Qwant version bretona qu'estó donc aviat au començar deu mes. Que favoriza los sites en «.bzh », mes tanben los mèdia de Bretanha, los hialats sociaus locaus, etc. Cap a 4 000 sites «.bzh » qu'estón referénciats, l'interfàcia qu'ei dens la lenga regionau e tau monde qui non parlan pas breton, en francés tanben plan segur.

Lo motor de recèrca qu'existeish dens 25 país e capvath 18 lengas. Despuish agost de 2015, Qwant qu'a ua version còrsa, qwant.corsica.

La soa version basca qu'ei en linha despuish ua òra, e la soa version catalana qu'ei anonciada dens las setmanas qui arriban. Lhèu lèu ua version occitana on La Setmana e poderé aparéisher au demiei deus purmèrs resultats de las recèrcas ?

                                         


Écrit par La Setmana le vendredi avril 14, 2017
Category: news - Tags: lenga, breton, occitan

« Barradura d'usina — Los salariats de l'enterpresa Yara en cauma a Pardias (64) - Pertrèit de Pierrick Bordenave, la lenga au còr… de las Lanas »