Lo setmanièr occitan

Quin avenir per La Setmana ?

Fa vint ans, en mai de 1995, nasquèt La Setmana. Primièr e unic setmanièr tot en occitan. Èra una escomesa de las audaciosas que de prepausar aquela mena de mèdia en lenga nòstra.

Fa vint ans, recebèrem entre autres lo sosten de l'escrivan Max Roqueta que signèt lo tot primièr edito. Aquò fa vint ans que las còlas successivas de La Setmana s'esfòrçan de vos informar sus l'anar del monde vist dempuèi Occitània quand es pas sus l'anar de la quita Occitània en pausant de questions pertocant a totes los Occitans. Los Bretons s'inspirèron d'aquela experiéncia e creèron lo setmanièr «  Ya !  » (òc, en breton) qualques annadas mai tard.

En vint ans, La Setmana a conegut d'evolucions nombrosas. Passèt del format «  tabloïd  » al format «  jornal  ». Cambièt cinc còps de formula. A cada còp la còla s'es esforçada de prepausar quicòm mai respècte a la formula precedenta. Avèm tanben creat una edicion en linha en 2012 que ne prepausarem una version refonduda per l'an que ven. Per la darrièra formula papièr en data, lançada l'an passat, avèm respondut a doas demandas que nos pareissián fondamentalas : l'augmentacion de la paginacion e subretot la diversitat dialectala. Dins la mesura de las nòstras possibilitats, nos esforçam de crear un equilibri entre los dialèctes utilisats per redigir los articles. Per çò far, avèm obèrt las nòstras colonas a de collaborators qu'an la possibilitat de tractar d'un subjècte los pertocant personalament o alara pertocant a lor encontrada de residéncia. Aquela obertura es estada possibla especialament mercés a la collaboracion activa de La Setmana amb d'autres mèdias occitans (Ràdio País, Ràdio Occitània e tanben lo Jornalet) pel biais de la Federacion Interregionala de Mèdias Occitans (FIMOC). 

Malgrat los esfòrces consentits, podèm pas que constatar que la nòstra situacion es de las delicatas. De faiçon generala, l'erosion del lectorat es un fenomèn al qual podiam pas escapar. Vertat que davant la multiplicacion dels otisses numerics (smart phones, tauletas, etc.) la premsa papièr dins son ensemble patís d'un cèrt desamor. Las consequéncias d'aquel fenomèn son de tant mai agudas per nosautres, que la premsa en lenga dita regionala es de facto dins una situacion mai fragila que non pas dins las autras lengas ditas «  oficialas  ».  A l'ora d'ara, trabalham dins de condicions dificilas pr'amor que sèm en jos-efectiu. A l'ora d'ara, la societat Vistedit recampa quatre salariats, una directritz qu'es tanben maquetista de La Setmana, una comptabla, una web-jornalista a temps parcial e un cap redactor. Es la meteissa còla que s'entreva de publicar las revistas pels mainatges que son Papagai e Plumalhon. Segur que i auriá besonh de plan mai de monde per poder trabalhar dins de melhoras condicions. Soslinhem que lo vòstre setmanièr es pas cap subvencionat. A despart d'una ajuda del ministèri de la cultura per los fraisses postals (ajuda tocada per totes los autres jornals e per de somas plan mai importantas) La Setmana a pas qu'una ressorsa : los vòstres abonaments. 

La Setmana a doncas besonh de mai d'abonats per contunhar. Avèm besonh de 400 abonats suplementaris sens los quals, serà de mai en mai complicat per nosautres d'assegurar las nòstras missions. Quitament se soscam de longa a la faiçon de portar de contenguts novèls pel biais dels mèdias que dispausam, nos interrogam tanben sus la continuitat del projècte. 

Dempuèi la debuta, aquel jornal es lo vòstre. I a mantunas faiçons de participar a aquel projècte e d'o far viure. I podètz escriure d'articles (en prenent contacte amb nosautres), vos i podètz abonar e tanben ne parlar a l'entorn de vosautres per trobar d'abonats novèls. Podètz tanben prendre un abonament de sosten en donant un pauc mai que los prètzes fixats. Mai que jamai, al cap de sos vint ans d'existéncia, La Setmana a besonh de vos per poder contunhar a informar los Occitans en occitan. 

La còla de Vistedit

Inf. : 05 59 81 02 59 — corric : lasetmana@wanadoo.fr — vistedit@wanadoo.fr 

Podètz telecargar aquel bulletin d'abonament en clicant sus l'imatge çai-dejós.
Bastarà pas que de l'imprimir, l'emplenar e de lo nos tornar mandar amb lo vòstre mòde de pagament a l'adreça :
SCOP Vistedit, BP 50 486, 64238 Lescar Induspal Cedex


Écrit par La Setmana le lundi novembre 2, 2015

« Aquitània : Virginie Calmels sospiècha lo jornal Sud Ouest de parcialitat - Carta europèa : la dreta senatoriala vòl pas de debat dins l'emicicle »