Lo setmanièr occitan

Professionals de la petita enfança meton en garda contra los dangièrs dels ecrans sus los drollets

Lo Dr Anne-Lise Ducanda postèt en linha una video per parlar del problèma. Mètge de la proteccion mairala e infantila de l'Essòna (91). Fa lo ligam entre la subrexposicion dels drollets de 0 a 4 ans davant los ecrans a trebols de l'espèctre autistic e problèmas envasissents del desvolopament. Dr Ducanda declarèt que i a 14 ans, 35 mainatges li foguèt senhalats « en dificultat » per las escòlas sus 1000 escolans de mairala en petita e mejana seccion de l'Essòna : « Dempuèi un an e mièg, me'n senhalèron 210 en granda dificultat. Cada setmana, soi sollicitada per cas novèls. A dich de rencontrar los joves, ai fach lo ligam ambe la consomacion d'ecrans », çò diguèt al jornal Le Figaro. Los tres quarts dels mainatges que vei en consulta passan al mens 6 oras cada jorn davant los ecrans. Se constata qu'una (granda) partida dels parents daissan lors mainatges gaitar la television, o la tableta e l'ordenador per non pas ésser destorbats o se senton rassegurats perque lors mainatges gaitan que de programas que lor son destinats amb aplicacions dichas « educativas ». 

Lo site d'informacion Slate consacrèt un dossièr sul sicut e entrevistèt lo president de SOS Addiction, William Lowenstein. Aqueste evòca l'aparicion de problèmas coma la limitacion de l'imaginacion, dels escambis ambe los autres, cambiaments dins lo desvolopament del cervèl.

Lo mètge Ducanda vòl botar en plaça navèls estudis scientifics per provar lo ligam entre lo creis del nombre de mainatges ambe una forma de trebol autistic e la subrexposicion als ecrans.


Écrit par La Setmana le vendredi juin 9, 2017
Category: news - Tags: medecina, santat, mainatge, educacion, ecran

« 21en recampament annadier dels calandrons de Lengadòc lo 15 de junh - « Memòria en partatge », vol.2 : sauvaguardar lo patrimòni culturau immateriau »