Lo setmanièr occitan

Prèmi Jan Moreu tà la Calandreta de Tarba

L'Ofici Public de la Lenga Occitana que creè l'an passat un prèmi, lo de l'innovacion en politica linguistica, au quau e balhè lo nom simbolic de Prèmi Jan Moreu. Que recompensa un projècte innovant entà accions o produits qui participan au desvolopament de la transmission e a l'usatge o la socializacion de la lenga occitana. Jan Moreu, militant occitanista bigordan, que tribalhè tà la creacion de l'OPLO. Que's morí en 2015. 

Augan, qu'ei la Calandreta de Tarba (65) qui s'emportè lo Prèmi Jan Moreu. Un simbèu puish a que Jan Moreu i èra pair de calandron. L'escòla que realizè un àlbum dab un quinzenat de cantas tradicionaus, dont « Lo cap de l'aso », « L'Aranesa » o enqüèra « A Bordèu ». Cap a 65 escolans que participèn a l'aventura. Tot au long de l'annada, que repetín las cantas dab Bastien Miquèu. Que hè 8 ans dejà que lo professor e vien tà la Calandreta tà balhar cors de cantas polifonicas aus mainatges. Dijaus 1èr de junh que's debanè la remesa deu prèmi a la Calandreta de Tarba. Malament, l'OPLO non podó pas har lo desplaçament mes que s'engatgè a viéner lo 30 de junh tà la hèsta de l'escòla e lo Huec de la Sent Jan, organizats au Prat d'Ibòs. La recompensa que permeterà a l'escòla de poder finalizar l'àlbum e de'u comercializar. 

Inf. : https://www.facebook.com/pg/calandreta.de.tarbes/photos/?tab=album&album_id=908553145876645

Fòto : Silvan Carrère de Ràdio País

Aquiu lo reportatge de Ràdio País : 


Écrit par La Setmana le jeudi juin 8, 2017
Category: news - Tags: ensenhament, calandreta, tarba, moreu, jan, oplo, musica

« « Memòria en partatge », vol.2 : sauvaguardar lo patrimòni culturau immateriau - Un projècte d'arrestat tà la refòrma deu Collègi »