Lo setmanièr occitan

Pau : tresen jorn de mobilizacion dels artesans de la fèsta (VIDEO)

Lo dialòg amb la comuna es al punt mòrt. Las solucions de relòtjament prepausadas per François Bayrou convenon pas als artesans fieirals que vòlon demorar sus la Hauta Planta (plaça de Verdun).

Foguèt question un temps de desplaçar las fèstas fieiralas (dos per an) dins los locals de la fièira a las mòstras, a un centenat de mètres. Una solucion que conveniá pas als professionals, compte tengut de complicacions d'installacion e de l'impossibilitat pels usatgièrs de se parcar a posita. Ièr, al cors d'una entrevista, François Bayrou prepausèt de los desplaçar a l'estadi Tissié, situat en bas de la vila fàcia a la gara SNCF. « Es d'aquí que partisson lo torn de França e tanben lo grand prèmi automobila de Pau, çò a dit lo conse paulin a la premsa, es un terren fòrça accessible. Çò que vòlon es la plaça de Verdun (...) An ensajat l'intimidacion e cedirai pas. Lor ofrissèm un terren qu'a mon sens es melhor, comercialament. Sèm dispausats a far las òbras que i aja una alimentacion electrica ».

Per el, la Hauta Planta fa mestièr per far viure lo còr de vila. Installar la fièira dos còps per an rimariá a pèrdre 80 000 plaças pendent aqueles laps de temps. Mas los artesans fieirals vòlon pas partir d'un endret ont s'installan tradicionalament. Demandèron al conse de s'engatjar per escrit de los daissar tornar a Verdun, un còp las òbras acabadas. François Bayrou refusèt. Los manifestants partiguèron doncas emmaliciats de las convèrsas, al cap d'un quart d'ora. Resulta : lo movement contunha uèi en s'intensificant e la velha, los artesans escampèron de tomatas e d'uòus sus la faciada de l'ostal de la comuna a l'eissida d'un cara e cara tibat amb la polícia sus la plaça reiala.

Uèi, segon lo quotidian La République des Pyrénées, de manifestants aurián previst d'anar far un torn del costat de Bordèras, ont se tròba lo domicili de François Bayrou. De gendarmas los espèran. Cap a 10 h, l'accès a l'A64 èra blocat pels camions que rotlan al pas d'èst en oèst sus la rocada al nòrd de la vila. La circulacion sus l'autorota foguèt arrestada dins los dos sens un quart d'ora mai tard. Los artesans vòlon que lo movement de Pau siá exemplar per l'ensemble dels fieirals del país. Dempuèi doas setmanas, una peticion es en linha sus la plataforma change.org mas a pas recampat qu'un pauc mai de 500 signaturas a l'ora d'escriure aquelas linhas. 

Inf. : en video, la partença dels manifestants aqueste matin a 8h20 dempuèi la Hauta Planta. 


Écrit par La Setmana le vendredi mars 31, 2017
Category: news - Tags: Pau, Fieira, Manifestacion, Blocatge

« Musica : lo primièr album de Cocanha en linha ! - Tartàs (40) - Acamp d'informacion tà l'obertura d'ua classa bilingua »