Lo setmanièr occitan

Pau : cap a una senhalizacion trilingüa a l'universitat ?

Lo 9 de mars, lo Conselh d'administracion se deu prononciar sus l'installacion d'una senhalizacion trilingüa francés-occitan-euskara dins lo campus. 

A la basa, es una reïnvidicacion de la seccion paulina del Movement dels Estudiants d'Occitània. Va benlèu venir una realitat. Coma es ja lo cas al Conselh departamental, las direccions serián indicadas en francés, occitan e basc al dintre de l'universitat bearnesa. Aquò pertocariá tanben als campus del Mont e de Tarba. Dins las antenas de la còsta basca, òm prefeririá una senhalizacion francés-basc-occitan.

L'Institut Occitan d'Aquitània (Inòc) seriá encargat de las traduccions en lenga nòstra. « Que vienem de luenh, çò nos a dit Joan-Brèç Brana, respondable del pòl lenga e societat de l'Inòc, au debut que devèva estar un trilingüisme francés-anglés-espanhòu. Que cau tostemps convéncer lo monde e har pròva de pedagogia. Qu'an pres en compte lo hèit qu'aquera universitat e's tròba en un territòri on coabitan duas lengas vitècas ».

Pel moment lo quasèrn de las cargas es encara en convèrsas. Aquò se fariá progressivament, en seguida de l'obertura de bastiments novèls o alara per remplaçament de panèus ancians. Manca pas mai al Conselh d'Admnistracion que de l'acceptar lo 9 de mars que ven. 


Écrit par La Setmana le vendredi février 17, 2017
Category: news - Tags: Societat, UPPA, Trilingüisme

- Tecnologia : peticion per una emoticòna amb lo drapèu basc sus WhatsApp »