Lo setmanièr occitan

Pau (64) — Un acòrd trobat enter la mairia e los heirèrs

La Setmana qu'avè seguit l'ahar quauques dias a, arron mei d'ua setmana de conflicte, la mairia de Pau e los heirèrs que trobèn un acòrd. 

Qu'estó oficializat ger, lo navèth emplaçament de la hèira tà dus ans a l'estadi Tissié (fàcia a la gara). L'acòrd qu'estó signat enter l'adjunt au maire en carga de l'urbanisme Jean-Paul Brin e los representants deus heirèrs acompanhats deu lor avocat. 

Los heirèrs non dèishan pas l'idea de poder tornar d'ací dus ans a la plaça Verdun, arron los tribalhs d'amainatjament deu parcatge pagant. La plaça Verdun qu'ei l'emplaçament istoric de la hèira. La seishantena de camions que deishè la plaça Verdun cap au parcatge de l'ipodròme de Pau. Que vieneràn tà l'estadi Tissié au ser, quan l'installacion de l'electricitat e sia hèit peus servicis. 

La hèsta que començarà aqueth dissabte a Pau dab ua setmana de retard, en preséncia deu maire de Pau, François Bayrou. 

La setmana passada, los heirèrs que lancèn ua « operacion escargòlh » dab un centenat de camions sus las rotas paulinas e l'autopista distribuint paperòts entà har enténer la lor votz. La circulacion qu'estó blocada pendent òras a l'entorn e en còr de vila. 


Écrit par La Setmana le mercredi avril 5, 2017
Category: news - Tags: heira, pau, bayrou, verdun

« Lo diccionari deus mots de las nostas regions de Loïc Depecker en libreria - Miquèu Berdòt e lo collectatge deu país deu Marsan au Cafè gascon de Dacs (40) »