Lo setmanièr occitan

PACA : la Region privilègia lo Collectiu Prouvènço

Lo president Christian Estrosi (DR) a trencat. Lo movement provençalista recebrà un mièg-milion d'euros de subvencions per son projècte d'« observatòri de la lenga provençala » mentre que las escòlas immersivas de Provença perdràn 35 000 euros de subvencion regionala.

Lo projècte es plan endralhat. Segon çò qu'indica lo nòstre confraire Miquèu Neumuller dins l'edicion en linha d'Aquò d'Aquí, lo movement provençalista seriá plan en mesura d'adobar la vièlha bastida qu'aculhirà l'observatòri, dins la comuna de Chivau Blanc, en Vauclusa. Divendres, pendent l'amassada plenièra, foguèt autrejada una subvencion de 490 000 euros a la comuna vauclusiana en partenariat amb lo « Couleitiéu ».

Segon Miquèu Neumuller, lo projècte « s'inserís dins lo dispositiuluòcs de conservacion de las tradicions regionalas ”» e sa subvencion serà imputada a l'encastre d'intervencion de la politica regionala. Los portaires del projècte se pòdon tanben esperar a de dons pel biais de la Fondation de France qu'an ja passat lo cap dels 10 000 euros. « Aqueu Projèct “resolument mistralenc” segon sei documents de propaganda, se vòu una mena de consèu oficiau de collectivitats en Provença, çò escriu Neumuller, ansin se ditz instància representativa au sen dau Consèu Regionau e dau Pargue Naturau Regionau dau Leberon ».

De son costat, la federacion provençala de las Calandretas a vist son ajuda regionala passar de 75 000 a 40 000 euros. Motiu evocat pel president Estrosi : « l'associacion reconeis pas la pluralitat de las lengas regionalas e s'inscriu pas dins la politica de defensa de lidentitat e de las tradicions de la cultura, de la pluralitat de l'eretatge cultural, comprés dins lo domeni lingüistic volgut per l'executiu ». Traduccion : las escòlas Calandreta ensenhan pas la lenga que cal. Bernat Vaton, president de la federacion, convidèt lo sénher Estrosi a visitar una Calandreta per se mainar que s'i parla lo parlar que cal en foncion de l'endret ont es installada l'escòla. Pensi lo president victima de « desinformacion ».  

Quitament se calrà esperar d'unes meses abans d'i veire mai clar, sembla que la Region se siá plan endralhada dins una politica de conservacion patrimoniala puslèu que sus una politica de transmission efectiva de la lenga. 


  

  
 


Écrit par La Setmana le lundi décembre 19, 2016
Category: news - Tags: Provença, Region, PACA, Estrosi

« 3au edicion de la formacion Tots en Dança ! - País basc : reaccions vivas après las interpelacions a Louhossoa »