Lo setmanièr occitan

« Oui au pays catalan » aprèsta las legislativas

Jordi vera, coordenator del movement nòrd-catalan n'a explicat las intencions al micrò dels confraires de France Bleu Roussillon (fòto FBR). 

Causa promesa, causa deguda. Après las manifestacions d'oposicion al nom de la Region, los sòcis del movement « Oui au pays catalan » aviá indicat que prendrián part a las escasenças electoralas venentas, en l'ocurréncia las eleccions legislativas. Al micrò de la locala publica de Rosselhon, Jordi Vera a anonciat que las ambicions son « maximalas » e que se presentan per « ganhar ». « Los Catalans fan pas mai fisança als partits del sistèma, çò a dit, de personas onèstas que se son levadas per defendre lo país catalan son las mai adeqüatas per defendre lo nòstre territòri ».

Vera insistís sus aquela nocion de territòri « abandonat per la classa politica » sens se definir coma catalanista... Causa curiosa pel líder de la seccion locala de la Convergéncia Democratica de Catalonha (partit als afars al sud) que mena d'aquesta passa lo procèssus unilateral d'auto-determinacion de la Generalitat. Pel moment, « Oui au pays catalan » balha pas encara de noms dels e de las que portaràn sas colors a las legislativas. Lo quite Jordi Vera ditz pas que serà candidat (sens o forabandir) puèi que las investituras se faràn al mes de mars.

De faiçon logica, lor tèma principal serà la transformacion dels Pirenèus-Orientals en una collectivitat « dins l'encastre de la Republica ». Jordi Vera cita l'exemple de l'EPCI obtenguda pels basques e que recampa totas las comunas bascas (e tanben las comunas occitanas del Baish-Ador) dins son perimètre. Pasmens, precisa pas se desira una collectivitat a la mòda còrsa coma los sòcis d'Unitat catalana. Qué que ne siá, la tòca per el es que las decisions se prengan « a Perpinhan e non pas a Montpelhièr o a Tolosa ».


Écrit par La Setmana le jeudi février 16, 2017
Category: news - Tags: Politica, Catalonha, Vera, Legislativas

« RDV : l'ultima creacion d'Eric Fraj (AUDIO) - Somari de La Setmana n° 1070 »