Lo setmanièr occitan

Orlhac : presentacion del filme Lo Paure Baptista

Una representacion catalana assistiguèt a l'acte en sosten de l'accion culturala. Presentaràn lo filme a Barcelona, Santa Coloma de Queralt e Santa Coloma de Farners, dins l'encastre d'una segonda jornada. 

Dissabte passat a Orlhac (Castanhau) se presentèt davant un auditòri de 150 personas lo filme « Lo paure Baptista ». S’agís d’una òbra de Giral Roussiés, parlada en occitan e producha per Arsène Images, una associacion occitana e occitanista d’aquela vila. De remarcar que lo realizaire poguèt pas veire acabada son òbra; Giral Roussiés moriguèt abans la fin del rodatge, que foguèt alestit per Olivièr Antony. L’acte de dissabte al Lycée Saint Geraud d’Orlhac foguèt tanben un omenatge a Roussiés e a son trabalh de tantas annadas en favor de la lenga e la cultura occitanas.
 
« Lo paure Baptista » pòrta al lengatge cinematografic un passatge del roman Les òmes de l’ecir, de l’infatigable difusor de la lenga occitana Fèliç Daval e amb una larga òbra ja publicada. Es interpretada per d’actors non professionals, dont los escolans de la Calandreta del Vernhat. 
 
Rodada dins los vilatges de Girgòls, Raulhac, Sant Julian e Marmanhac, l’istòria raconta la vida aimabla e enrasigada dins la tèrra de las gents de Cantal dins los ans setanta. Una vida que risca de desaparéisser, engolida pels tempses modèrnes que despòblan las societats ruralas e arrancan l’identitat de lors gents. Lo projècte es estat finançat amb d’apòrts particulars d’Arsène Images e una ajuda del Crédit Agricole Centre France.
 
Una representacion catalana, de Santa Coloma de Queralt e Santa Coloma de Farners, assistiguèt a l’acte en sosten de l’accion culturala. Una comission ciutadana de las doas vilas organizèt en 2014 una Jornada Occitana per difondre l’identitat, la lenga e la cultura d’aquela nacion demest los catalans. Cal remembrar que l’occitan es lenga oficiala per la lei del quite Parlament de Catalonha.
 
La comission catalana a lo projècte de presentar lo filme a Barcelona, Santa Coloma de Queralt de Santa Coloma de Farners, dins l’encastre d’una segonda jornada.
 
Ramon Sargatal peu Jornalet


Écrit par La Setmana le jeudi juillet 6, 2017
Category: news - Tags: jornalet, cinema, occitan, sargatal

« Lo Cercle Occitan de Narbona animèt lo Total Festum - Lo CIRDOC que passa en mòde estiu »