Lo setmanièr occitan

Ocfutura e « lo vòte dens los país d'òc »

Lo navèth tèma de l’espaci numeric occitan, Ocfutura, qu’ei d’ara enlà en linha. Lo subjècte causit qu’ei « L’evolucion deu vòte dens los país occitans ». Qu’i poderatz trobar com d’acostuma l’article redigit per La Setmana sus la bipolaritat politica istorica Nòrd-Sud. Ràdio País que perpausa ua entervista audio sus l’evolucion deu partit occitan Entau País. Lo Congrès permanent de la Lenga occitana qu’assegura la partida lexicau.

Lo CIRDÒC que’ns hè descobrir documents reales sortits deus archius de la mediatèca a Besièrs. Deu son costat, l’InÒc Aquitania que presenta ua bibliografia suu tèma deu mes. ÒcProd que hica a disposicion ua infografia deus vòtes a las eleccions legislativas despuish 1958 e un tribalh audiovisuau sus las especificitats electoraus de la vila de Besièrs despuish 1936. Nautat de bon notar : l’entrada dens lo projècte de mutualizacion d’Ocfutura de l’INA. Tad aqueth mes, l’Institut audiovisuau que horneish ua entervista de Guy Héraud, candidat federalista europèu a las eleccions presidenciaus de 1974.

Dab 0,08 % deus sufragis obtienuts au 1èr torn, qu’ei la mèrca la mei baisha pas jamei obtienuda dens ua eleccion presidenciau. Totun, lo candidat que volèva servir de pòrtavotz tà denonciar la situacion de las minoritats etnicas en França e au nivèu europèu.

Inf. : www.ocfutura.com


Écrit par La Setmana le jeudi juillet 20, 2017
Category: news - Tags: ocfutura, setmana, vote, eleccions, occitan

« Un empont mei e ua moneda pròpia a l'Estivada 2017 - Tres vidas, un viatge musical e poetic »