Lo setmanièr occitan

Occitània : polemica sul nom... dels estatjants de la Region !

Se pausa d'ara enlà la delicata question del nom a donar als estatjants de la Region Occitània / Pirenèus-Mediterranèa... amb una primièra polemica.

Pels besonhs d'un article de 20 minutes sul sicut, la jornalista Béatrice Colin a sollicitat Joan-Francés Laffont, president de Convergéncia occitana. Lo president d'aquela federacion de 80 associacions indica que « la Region administrativa recampa 90% d'Occitània istorica » e que los estatjants se dison doncas « Occitans ». E la jornalista d'apondre qu'es « una apellacion tanben valabla pels que practican la lenga occitana a Lemòtges o Tolon ». Aquela declaracion de Joan-Francés Laffont foguèt represa suls malhums socials, asprament criticada e vista coma una novèla marca de confiscacion del nom del país nòstre. 

Contactat per La Setmana, Joan Francés Laffont a explicat qu'aviá plan faita la distinccion entre l'Occitània istorica (Occitaniae, lo nom latin dels Estats de Lengadòc), l'Occitània administrativa (la de uèi, eissida de la reforma territoriala) e l'Occitània lingüistica (descrita per Mistral e Perbòsc e espandida sus 33 departaments). « Ai explicada aquela diferéncia a la jornalista que l'a pas tornada prendre, çò nos a dit Laffont, uèi tot lo monde es d'acòrd (istorians, universitaris, etc.) per dire qu'Occitània istorica (los Estats de Lengadòc) correspond mai o mens al territòri actual de la Region Occitània / Pirenèus-Mediterranèa ». Es qu'èra pas un pauc riscat de far un tal detalh per un lectorat qu'es pas forçadament assabentat d'aquelas questions coma o pòdon èsser los occitanistas ? « Mancam de pedagogia, çò pensa Laffont, nos cal explicar aquelas subtilitats al monde ». 

Per çò qu'es del nom dels estatjants, li sembla normal que se digan Occitans puèi que, coma o precisèt dins 20 minutes, « Occitanians », aquò correspond pas a res e que los « Occitanistas » son los militants. « N'i a que se dison Occitans dins d'autras regions pr'amor parlan la lenga. Los estatjants se pòdon dire Occitans puèi que demòran dins la Region. Anam pas inventar lo super-Occitan que demòra dins la Region e que parla la lenga » çò nos a explicat. En clar, per el, i a d'Occitans que demòran dins la Region administrativa d'aqueste nom coma i a d'Occitans dins l'Occitània lingüistica que coneissèm plan. Qué que ne siá, i a pas encara d'apellacions oficiala pels estatjants a l'ora d'escriure aquelas linhas. Es un debat que promet de pas èsser tèrne. 

Clamenç Pech 

 

 


Écrit par La Setmana le mercredi novembre 23, 2016
Category: news - Tags: Occitània, Region, Nom, Estatjants, Polemica, Laffont

« D'Stimme, lo « The Voice » alsacian - Patrimòni : los cabanons de Marselha seràn d'istòria anciana ? »