Lo setmanièr occitan

Musica : lo primièr album de Cocanha en linha !

Se ditz « I ès ? », es lo primièr disc publicat pel girls band polifonic, se pòt escotar o telecargar e se poirà crompar en fisic a partir del 8 d'abril.  

Aquel primièr album, las tres cantairas an causit d'o far madurar. Aquò a començat per una primièra sesilha a la Ferronerie (Juranson, Bearn) qu'auriá pogut èsser l'album definitu... mas non, volián far melhor. Aquò a contunhat per una sesilha video enregistrada dins una de las cavas de La Candela (Tolosa). Aquò a donat una version experimentala de la borrèia « M'an dit Martin » (veire video) que figurarà sus l'album. Foguèt enregistrada amb doas dançairas (Camille Lainé e Luce Lozano) per ajudar a la ritmicitat. « Que volèvam vertadèrament enregistrar la dança, çò nos a dit Carolina Dufaur, que volèvam un son naturau dens lo quau e's podossen enténer los nostes còps de pè suu ponde ». Una version literala del cant a dançar, en soma.  

Après una tresena sesilha en decembre, destinada mai que mai a far de finholatge, lo repertòri final èra prèste a mandar al pressatge. Conten de cantas que las tres filhas an carrejat amb elas sus l'empont e d'autras petaçadas dirèctament en estúdio. Lo « Saut de Garona » (ja gravat sul disc) foguèt experimentat pel primièr còp sus scèna a l'escasença del Carnaval Bearnés, fa a penas un mes ! D'autres coma « Tant que farem aital » son completament nòus !

En esperant de los poder veire en live al Primtemps de l'Arribèra (lo 15 d'abril a 21h a Sent Pèr de Lerèn, Bearn), poiretz totjorn escotar e/o telecargar l'album disponible sus la plataforma bandcamp. Serà disponible en supòrt fisic a partir del 5 d'abril. Lo quite jorn, Cocanha ne festejarà la sortida per un concèrt a la Cave Poésie (Tolosa) a partir de 20 h 30.

Inf. : cocanha.net — https://cocanha.bandcamp.com (per telecargar l'album)


Écrit par La Setmana le vendredi mars 31, 2017
Category: news - Tags: Musica, Cocanha, Album

« Narbona (11) — País Nòstre que denoncia l'acte d'un ensenhaire - Pau : tresen jorn de mobilizacion dels artesans de la fèsta (VIDEO) »