Lo setmanièr occitan

Monica Sarrazin premiada per la jurada Jaufre-Rudel

La Jurada Jaufre-Rudel a decernit per 2017 a la Monica Sarrazin (Fòto JG), diplomada d'Occitan a Monpelhièr, lo Prèmi per l'ensemble de son òbra.

Es al Cafè associatiu « Lezidefuz » de Laguilhac de Cercles (24), (lòc d’animacion plan conegut !) davant un public attentiu e calorós, que  li fuguet remés aquel Prèmi dimècres 10 de mai.
 
Lo Prèmi Jaufre Rudel onora lo trobador « princi » de Blaia, creator de L'Amor de luenh. Desempuèi 1959, la Jurada aguèt per President diversas personalitats, dont lo Majorau Monestier, e fuguèt sostenguda per lo Conselh Regional d'Aquitània. Es atal qu’a permés, malgrat qualquas interrupcions, una difusion larga d'òbras de força autoras e autors tant dins lo public que dins las bibliotècas.

Dins una lenga clara e rica, l'autora fa los retratches vius, plasents, finament observats e racontats, de personatges de « son monde ». Monica Sarrazin nos mena donc dins un viatge tant literari qu'uman al còr d'un Lemosin d'i a quauquas annadas.

Los obratges de l'autora son publicats a las Edicions  « Lo Camin de Sent-Jaume », (menadas pel valent Jan dau Melhau), dins la colleccion « Nòstre Monde ». La tresena partida de son òbra : « D'entre tant, quauques uns » sortiguet darrièrament.  

Inf. : Sarrazin Monica « D'entre tant, quauques uns », (2016) Edicions del Camin de Sent Jaume — Tarifa : 13 €.

Alan Rault

                                    

 


Écrit par La Setmana le jeudi juin 1, 2017
Categories: news, events, books - Tags: sarrazin, literatura, libe, occitan, jaufre, dordonha

« Legislativas Lanas — Candidats exclús deus debats - Fotbòl — L'AOF qu'anulla la soa participacion a la ConIFA Euro 2017 »