Lo setmanièr occitan

Manifestacion crisi aviària —Los neuridors que blòcan actuaument la Nacionau 124 a Aush

L'associacion Les Canards en Colère que protèsta contra lo non-pagament de las indemnizacions ligadas au vueit sanitari, arron la crisi de la gripa aviària. Despuish 5 òras deu matin, un cinquantenat de neuridors vienuts de mantuns departaments que blòcan la Nacionau 124 a la sortida d'Aush en Gèrs. Los accès d'entradas sus la rocada que son sancerament barrats. 

Que vòlen har pression suu govèrn suu subjècte sensible e alertar los conciutadans sus la situacion particularament complicada dens la quau e's tròban despuish mantuns mes. 
« Arron los episòdis de gripa aviària, nombrosas enterpresas dens la cordèra que son tanben hèra tocadas, e los avicultors deu sud-oèst que son shens nat revienguts despuish 194 dias ! Au-delà d'aquera situacion mauaisida, que son, com tots los lors collègas agricultors, a las estanças deu sòlde de las ajudas PAC », çò explica l'associacion Les Canards en Colère dens un comunicat enviat quauquas minutas a. 

L'ensemble deus avicultors, la Coordinacion Rurau e l'associacion Les Canards en Colère qu'exigeishen lo versament immediat de las indemnizacions de 2015/2016, l'indemnizacion deu vueit sanitari de 2017 abans la fin deu mes d'agost, l'adaptacion de las mesuras de biosecuritat en foncion de la talha e deu contèxte de cada neurissatge e la mesa en plaça de la vaccinacion. 

Lo 6 de junh passat, l'associacion qu'èra estada recebuda a la Prefectura deu Gèrs a Aush entà discutir. Los neuridors qu'avèvan balhat un ultimàtum tà que los hons prometuts e sian desblocats.  

Inf. : Facebook Les Canards en Colère — www.coordinationrurale.fr

Fòto © Hit FM 32


Écrit par La Setmana le mercredi juin 14, 2017
Category: news - Tags: agricultors, neuridors, guit, aviaria, indemnitat, estat, gers, aush

« Auvèrnha / Ròse-Alps : las calandretas del septentrion - Ua ràdio 100 % en lenga bretona lèu a Nantes ? »