Lo setmanièr occitan

L'universitat occitana de La Guépia de 2017

La Guépia, vilatge encantant ! L'associacion Lenga Viva qu'organiza augan la 17au edicion de l'Universitat occitana de La Guépia deu 10 de julhet enlà dinc au 15 de julhet. Ua setmana de las ricas, estudiosa, hestiva e conviviau au còr deu vilatjòt enter Viaur e Avairon.

L'associacion que s'escadó a apitar ua seria d'estagis seguits de canta e de musica : polifonias dab Manu Théron e Audrey Peinado, Reggae Ragga Dub dab Papet J. (deu Massilia Sound System) e Poupa Greg, canta deus Bauls dab Mimlu, Krishna e Paban das Baul. Tots que's debanan los vrèspes deu 10 au 14 de julhet. De non pas desbrombar lo tot navèth estagi « Attrapes », canta, dança e tamborin taus mainatges e adolescents de 7 a 13 ans.

 

Nautats augan donc, enqüèra mei dab la vienguda excepcionau deus Bauls deu Bengale. Los Bauls, representats a La Guépia per Paban Das Baul, Mimlu Sen e Krishna, qu'animèn talhèrs en França, en Índia, en Grana Bretanha e au Mexic enter 1994 e 2016. Lo contacte dirècte dab los participants que's hasó esponatemanent capvath lo lengatge reau e deu maravilhós qui ei lo lengatge naturau deus Bauls.

L'objectiu d'aqueth estagi qu'ei ua iniciacion practica e dirècta a las cantas, las musicas, los ritmes e las danças deus cantaires Bauls deu Bengale. Capvath l'aprenedissatge de tres cantas, tres ragas, tres ritmes e tres movements de dança : terrèstre, lunar e solar, Paban e Mimlu, acompanhats de Krishna, que'vs haràn descobrir lo monde sonòr e imaginari e lo mòde de vita Baul.

L'inicacion que's harà tanben capvath la descobèrta de la lenga « intencionau » de las cantas bauls, d'exercicis de votz, l'aprenedissatge de las paraulas en fonetic, la repeticion vocau.

Au medish temps que serà perpausada ua iniciacion aus instruments melodics bauls : l'ektara (bordon), lo dotara (lut) e instruments de percussion com lo doubki (tamborin) e lo khamak (tambor a còrdas) e las karatalas (cimbalas).

Entresenhas mei suu contiengut e lo metòde sus www.lengaviva.com / Corric : clementine.lengaviva@laposte.net / Tel. : 06 08 30 21 42.  


Écrit par La Setmana le dimanche juillet 2, 2017
Category: news - Tags: universitat, ensenhament, estagi, occitan, guepia, cultura, theron

« Somari de La Setmana n°1080 - Dilèma en Gironda : que causir lo 1èr de julhet ? »