Lo setmanièr occitan

Los Occitans en massa au Salon de l'Agricultura 2017

Paris Expo Pòrta de Versalha qu'arcuelherà deu 25 de heurèr dinc au 5 de març l'edicion 2017 deu Salon de l'Agricultura.
Lo salon que serà dividit en quate partidas : Neurissatge e las soas cordèras, culturas e cordèras vegetaus e casau, produits de las Regions de França, d'Otramar e deu Monde, e servicis e mestièrs de l'Agricultura. Talhèrs, ua bòrda pedagogica e un espaci emplec (formacions) que seràn perpausats au public.

La presidenta de la Region Occitania, Carole Delga, que visitarà lo Salon lo 28 de heurèr a partir de 10 òras a la descobèrta deus talhèrs regionaus. Que serà acompanhada peu Vincent Labarthe, vice-president de la Region en carga de l'Agricultura e de l'Ensenhament agricòla, de Jean-Louis Cazaubon, vice-president en carga de l'Agroalimentari e de la Viticultura e de Denis Carretier, president de la Cambra regionau d'Agricultura.

Cap a 60 expausants (productors, artisans e enterpresas) e un cinquantenat de neuridors de tota la Region que seràn presents sus divèrs taulèrs regionaus. Un estanquet a ústrias (de Mediterranèa) que serà tienut per un conquilicultor. Que s'i poderà trobar tanben un estanquet a vins e produits regionaus e 6 taulèrs institucionaus dab la representacion deus departaments d'Arièja, de Gèrs, de Garona-Nauta, d'Eraut, de Losera e de Tarn.

La Region que serà presenta dens lo Hall deus neuridors dab un taulèr dedicat au neurissatge e a las produccions animaus regionaus.

De notar la preséncia de 1000 vinhairons girondins au Salon tà presentar los lors produits locaus.

La Region Auvèrnhe-Ròse-Aups que harà descobrir los produits deu son terrador dab mei que mei productors d'Isèra (mèu, òli, carnsalada, vins, etc.)

Lo licèu agricòla d'Ortès que participarà au Trofèu Nacionau deus Licèus Agricòlas organizat pendent lo Salon de l'Agricultura. La tòca deu concors, avalorar lo tribalh realizat dens los establiments d'ensenhament agricòla. Los liceans que seràn notats dens ua espròva de comunicacion dab la creacion d'ua afica e d'un blòg, ua espròva de manipulacion d'un bovin en tota securitat, puish la presentacion de la bèstia e l'implicacion deus liceans suu salon.  

En 2016, lo Salon de l'Agricultura qu'èra 611 015 visitaires, 1050 expausants originaris de 22 país, mei de 3 850 bèstias (mei de 345 raças), 16 754 vins presentats per 3 848 productors e 5 398 produits d'origina bordalèra, artisanau o industriau.

Inf. : Lista de las Regions e deus productors presents sus www.salon-agriculture.com


Écrit par La Setmana le jeudi février 16, 2017
Category: news - Tags: agricultura, paris, bestias, occitania, region, navera, aquitania

« Somari de La Setmana n° 1070 - Marselha : Corsica Linea tira camin »