Lo setmanièr occitan

Los 5 ans deu Jornalet au CIRDÒC (Audio)

La gaseta occitana en linha, Lo Jornalet qu'estó lançada suu net cinc ans a. Lo son capredactor, Ferriòl Macip (Fòtos ©La Setmana), que hestegè l'aniversari deu jornau dab mantuas datas capvath Occitania tota, Marselha, Narbona e Besièrs divés passat. Qu'encontrè aus legidors, qu'escambièn, qu'amassèn ideas, suggestions e proposicions d'amelhorança deu site en linha. Dab ua grana volontat d'evolucion e d'escota, Ferriòl que declarè : « Tot çò que caldrà per far en sòrta que Jornalet siá un jornal de totes e per totes ». E d'ajustar : « Sèm pas perfièches e es plan segur que fasèm d'errors. Esperam alavetz que nos ajudetz a nos melhorar amb vòstres comentaris, criticas e contribucions ».
L'eveniment que's debanè au CIRDÒC, centre interregionau de desvolopament de l'occitan. Un debat a l'entorn de « los que fan l'actualitat al sègle XXI » que's debanè pendent ua òra e mieja en companhia de Ferriòl (au miei de la fòto, ©LT), de Marius Blenet (France 3 e Ràdio Lengadòc Montpelhièr, a esquèrra sus la fòto) e de La Setmana qu'èra tanben convidada a participar a las discutidas.

                                 

Arron ua presentacion rapida deus parcors personaus e professionaus de cadun, lo ròtle de la premsa occitana dens lo monde de la premsa actuau, de las fòrmas que prenen aqueths mèdia e deus enjòcs dont son portaires. La tòca d'aqueth encontre qu'èra de promòver lo riquèr deus nostes mèdia mes tanben d'amuishar las fragilitats deu noste mestièr d'expression occitana. Lo debat qu'estó animat per Sandra Juan deu CIRDÒC.
Com ac disèva James Costat, cercaire dens las lengas minoritàrias, dens lo son estudi sus la premsa en lenga regionau, « la premsa en lenga minorizada qu'aucupa ua plaça particulara dens lo paisatge de la premsa. Que s'acomòda d'un lectorat sovent redusit, de locutors qui non saben pas a còps legir la lor lenga, ua exigéncia de qualitat mei hòrta, un ròtle metalingüistic essenciau ». Lo ròtle pedagogic e didactic deus mèdia occitans qu'estó abordat pendent lo debat. Los participants que's demandèn si èra pertinent de difusar emissions bilinguas sus las ondas de ràdios o articles bilingües uei lo dia entà atirar un public mei larg. Los avís qu'èran partatjats sus la question. E cau demorar mèdia sancerament en occitan ?

Pertocant a la lenga, Ferriòl Macip que contè que's rendó compte lèu de l'influéncia o deu mensh de la portada que podosse aver dab Lo Jornalet quan un òmi dont carè lo nom, li perpausè moneda entà instaurar (impausar ?) la soa grafia dens la gaseta occitana. Auhèrta qu'arrefusè plan segur. Los jornalistas presents que's regaudín de la libertat qu'an de causir los subjèctes que vòlen tractar e deu biais dont ac vòlen. La tendéncia dens tots los mèdia òc a parlar de l'actualitat literària e musicau occitanas pr'amor que son realizadas en lenga nosta, e pas forçament pr'amor que son de qualitat, qu'estó soslinhada. Uei lo dia, segon los professionaus, que cau estar un minímum « militant occitanista » tà tribalhar (com jornalista) dens lo mitan occitan uei lo dia.

Lo besonh de professionalizacion e de mutualizacion dens e enter los mèdia occitans qu'estón mencionats rapidament. La FIMOC (Federacion Interregionau deus Mèdias Occitans) que tribalha sus aqueras problematicas. Un debat deus interessants, quitament se tròp brac, malament tròp rar per aquestes torns. Uns mèdia presents, com Tè Vé Òc, representat per la soa presidenta Lise Gros (Fòto ©LS) acompanhada de Claudina Paul, membra de l'equipa), que's regaudí d'aqueths escambis e que desira multiplicar aquestas ocasions enter mèdia tà desvolopar l'enterajuda. Mei èm nombrós, mei seram presents sus la scèna mediatica interregionau e valorizarà la lenga.

                              

La serada d'aniversari deu Jornalet que's clavè en musica dab lo grop Ballaveu e la son repertòri de musicas tradicionaus catalanas a dançar. Lo CIRDÒC qu'ei urós d'aqueth purmèr encontre e qu'espèra ne perpausar d'autes a l'aviéner : « l'avèm vist, lo subjècte es luènh d'èsser abenat. Aquel debat serà dobèrt a totes los mèdias que vòlon portar lor opinion sus la question (e aquel convit concernís los mèdias en òc coma totes los autres per justament pausar la question de l'occitan dins mèdias en general). Aquela serada foguèt tanben per nosautres l'escasença de programar pel primièr còp lo grope Ballaveu, una bèla descobèrta. Patri e Xavi, en despièch de la calor d'aquel divendres de junh, an fait « dançar » la mediatèca als ritmes catalans e occitans per un brave rencontre », çò nse digó Sandra Juan. 

Òsca au Jornalet e visca la nosta navèra collaboracion dab La Setmana. Arretrobatz sus La Setmana n° 1079, qui pareisherà aqueth divés, un article d'opinion signat per dus participants a l'eveniment organizat peu CIRDÒC.

Inf. : www.jornalet.com

Aquiu lo reportatge de La Setmana a l'aniversari deu Jornalet :


Écrit par La Setmana le jeudi juin 22, 2017
Category: news - Tags: setmana, jornalet, media, cultura, occitan, ferriol, cirdoc, besiers, blenet, teveoc

« La marca « Tarn, còr d'Occitania » que s'auhereish lo son 1èr hestenau ! - Arudi — Los Castellers que tornan en Vath d'Aussau »