Lo setmanièr occitan

« L'Occitan qu'a tot entà víver, si los Occitans ac vòlen », Patric Sauzet au hestenau Tarn Còr d'Occitània

Los 23 e 24 de junh, la vila de Vièlhmur qu'arcuelhó lo purmèr hestenau Tarn, còr d'Occitània. Arren de mei evident puish a que la vila de Tarn estó determinada per l'Institut nacionau de l'informacion geografica, com estant lo centre geografic de la navèra region. L'eveniment que's debanè dens l'encastre de las manifestacions hestivas occitana e catalana de Total Festum.

Mustras, concèrts, marcats deus productors e d'artisans, danças, descobèrta deus jòcs ancians e visita guidada de la vila, qu'animèn la vila de Tarn pendent dus dias.

Ua vrespada de mini-conferéncias qu'estó organizada lo purmèr dia dens ua sala de la mairia. Un trentenat de personas qu'estón curiosas de descobrir l'istòria deu lor territòri contada brilhantament per monde com Patric Sauzet de CLLE-ERSS (Cognicion, Lengas, Lengatge, Ergonomia/unitat mixta de recèrcas CNRS e de l'Universitat de Tolosa, © a l'esquèrra sus fòto) a l'Universitat Joan Jaurès de Tolosa, com Ugo Lavorata, guida a la hortalessa de Najac (miei sus la Fòto) o enqüèra Benjamin Assié, gavidaire deu CIRDÒC (animator deus escambis, a dreta sus la Fòto) e Jean Thomas, membre deu Conselh Lingüistic deu Congrès.

Lo vrèspe qu'estó dividit en tres sessions. La purmèra qu'èra consacrada a l'occitan com patrimòni multidimensionau au servici de la valorizacion deus territòris e deus lors actors. La mairia de Vièlhmur e conselhèra departamentau de Tarn, en carga de la lenga e de la cultura occitanas, Catherine Rabou e Patric Roux, conselhèr a la Region Occitania/Pirenèus-Mediterranèa, delegat a la lenga e a la cultura nostas, que's relaièn entà parlar deu subjècte. « Tarn qu'ei un exemple tà la valorizacion deu patrimòni dens la Region », çò declarè lo sénher Roux. E l'elegit d'ajustar : « Qu'ei un tribalh deus grans de provar a ua enterpresa, quina que sia, que tribalha tau territòri ! Arren n'ei mei aisit que de labellizar ua associacion occitana o ua calandreta, çò qu'avem l'acostuma de har despuish annadas ».

Abans de cercar quin hicar en valor lo territòri entà desvolopar lo torisme, çò d'important ei d'arrecaptà's o de tornar arrecaptà's lo territòri. La populacion que deu vàder actora deu desvolopament de la soa cultura pròpia, segon Patric Sauzet.

Que parlarà per aulhors deu sindròme de Joan Boudou dont son tocats la màger part deus Occitans : « Occitans sens o saber ». D'après lo cercaire, lo monde que'n saben mei de la lenga que ne'n son convençuts. « Que i a ua istòria que los Occitans ne coneishen pas pro, çò digó. Que cau reconéisher çò que sap la populacion, puish acceptar tanben que la cultura occitana aja fòrmas sabentas. Ne cau pas aver paur de la distinccion e deus neo-locutors qui parlan. L'Occitan qu'a tot entà víver, si los Occitans ac vòlen ».

                           

Lo purmèr contacte dab la cultura que's hè mercés a la toponimia d'un vilatge, d'ua vila, d'un país. Mercés ad era, que podem tornar traça d'activitat umana deu monde d'ací (la Molinassa, l'Albèrga nòva, Lou Pòrt...). Lo Jean Thomas (Fòto ©LS) que s'amusè a amassar las errors de grafia qui son multiplas, com los territòris deus Trucs vadut uei lo dia la zòna artisanau deus Turcs a Becièras. Lo patrimòni qu'ei un marcatge identitari e que cau inversir tà aver consciéncia de la soa identitat culturau, segon l'especialista.

Divèrs intervienents que soslinhèn que l'occitan èra ua vertadèra atenta deus toristas uei lo dia. « Lo monde que cèrcan un terrador e un patrimòni preservats », çò digó lo joen Ugo Lavorata. La problematica per un monument qu'ei totun lo joen public, çò expliquè : « qu'ei ua question centrau e qu'avem d'aulhors editat un liberet dab mots en occitan, jòcs e poèmas a destinacion deus mainatges destorbats ».

Los escambis e lo hestenau en eth-medish qu'avè per tòca màger d'interpretar las resultas de projèctes d'experimentacions realizadas suu territòri occitan e de favorizar los escambis enter los actors economics, institucionaus e culturaus implicats dens las politicas publicas centradas sus l'activacion de la ressorça occitana.

Lo purmèr dia que's clavè dab ua ceremonia solemna dab mantuns elegits deu departament e de Tarn entà felicitar lo tribalh realizat peu departament e lo comitat departamentau deu torisme de Tarn (CDT) e aus 450 aderents a la marca Tarn, Còr d'Occitània. Un detzenat d’actors (http://tarncoeuroccitanie.com) qui òbran tà la sauvaguarda e la promocion de la lenga e de la cultura nostas que’s vedón auherir l’estatut d’ambaishadors de l’occitan per la marca. Vistedit/La Setmana qu'avó l'aunorança de recéber aquera distincion sus plaça. La placa de « Vièlhmur, còr d'Occitania » qu'estó inaugurada sus la façada de la mairia de la vila au parat d'aqueth purmèr hestenau.

              

Aquiu l'entervista de Jean Thomas, membre deu Conselh lingüistic deu Congrès, qui participè com intervienent au vrèspe de conferéncias, seguida de la deu Pèire Thouy, apassionat d'occitan e d'ausèths, qui èra vienut en espectator, las lors impressions sus aquera purmèra edicion deu hestenau Tarn còr d'Occitània :


Écrit par La Setmana le lundi juin 26, 2017
Category: news - Tags: tarn, occitania, festenal, occitan, lenga, cultura, patrimoni, region

« Retrach de la setmana — Cecila Chapduelh, crear per transmetre - L'aprenedissatge en lenga occitana au Cafè Gascon de julhet »