Lo setmanièr occitan

Lo nacionalisme còrse en fòrça a l'Assemblada

Lo miaire nacionalista còrse e cònse de Bastia, Gilles Simeoni, saludèt la victòria istorica de tres deputats Pè a Corsica sus 4 circonscripcions au 2nd torn de las legislativas del 18 de junh : Michel Castellani, adjunt al cònse de Bastia, dins la 1ièra de Corsega-Nauta, Jean-Félix Acquaviva, qu'encarna la generacion novèla del nacionalisme insular, dins la 2nda e Paul-André Colombani dins la 2nda de Corsega del Sud. 

                          

La victòria es pas que la dels autonomistas e dels independentistas còrses mas tanben la d'un cambiament politic important : las eleccions legislativas venon pels nacionalistas un mejan de far ausir lors reivindicacions a l'Estat. Aital, los tres deputats còrses se faràn los pòrtaparaulas de la majoritat territoriala e demandaràn un estatut especific amb poder legislatiu de plen drech, la cooficialitat de la lenga còrsa, l'amnistia dels presonièrs politics e la creacion d'un estatut de resident. 

Lo Partit de la Nacion Occitana (P.N.O) saluda la victòria dels autonomistas e independentistas còrses, l'eleccion del purmèr independentista polinesian, Moetai Brotherson e la bona marca de G Simler de Unser Land, lo partit alsacian dins la 5ena circonscripcion del departament del Rin Bas. « En Corsega com en Alsàcia, aquela resulta n'es pas un azard. Es la frucha d'un trabalh unitari de recampament dins la diversitat de las fòrças còrsas e alsacianas contra lo centralisme francés ». Lo P.N.O apèla las Occitanas e los Occitans d'origina e d'adopcion a seguir lo camin traçat pels « patriòtas  còrses e alsacians ». « N'es pas qu'en ésser ensem dins lo respècte de lors divergéncias que las fòrças occitanas faràn recular durablament las formacions principalas ultra nacionalistas francesas en Occitania que son lo Front National e La France Insoumise », escriguèron dins un comunicat difusat ièr.  


Écrit par La Setmana le jeudi juin 22, 2017
Category: news - Tags: politica, corse, occitan, pno, legislativa, independentista, autonomista, assemblada

« Total Festum Narbona — L'espectacle « Tifa-tafa ! » encantèt los calandrons - La marca « Tarn, còr d'Occitania » que s'auhereish lo son 1èr hestenau ! »