Lo setmanièr occitan

Lo hestenau Xarnegu Eguna que torna

Deu 28 d'abriu au 07 de mai, sèt vilas xarnegu qu'arcuelheràn la 13au edicion deu hestenau Xarnegu Eguna.
Aquera manifestacion culturau que mira a promòver la mescla de las culturas e de las lengas e a desvolopar los ligams intergeneracionaus en mitan rurau capvath ua programacion  hestiva. L'eveniment que's debana a la crotzada de Bascoat, Bearn e Lanas.

Lo hestenau xarnegu que s'aubrirà dab ua mustra organizada per l'associacion Bidache Culture suus « Las 7 arts a Bidàishen ». Mei de 40 artistas amators e professionaus qu'i presentaràn las lors creacions. Ua fresca murau que serà realizada tot au long de la mustra per l'artista TAROE
L'artista Joan Francés Tisnèr que presentarà lo son espectacle « Trahaires », consacrat au l'òbra deu Felix Arnaudin, a la sala de las hèstas a 21 ò.

Divés lo 5 de mai, Guy Laporte que perpausa ua conferéncia sus « Lo país Xarnegu, ger e uei lo dia » au larèr de Came a 18 ò 30. Que serà illustrat dab nombrós imatges. 

Ua serada bal trad, com de qui cau, xarnegu, que serà animada peus Bascos, Patxi eta Konpania puish peus Occitans de Trencadit

L'endedia, lo 6 de mai, ua passejada qu'ei organizada en partença de l'Ofici de torisme de Guishe a 9 òras. Que durarà 3 òras (11,3 km). Qu'anaratz a la descobèrta deu patrimòni naturau e istoric de la vila. 

Arron lo hestenau, lo 5 de junh, ua jornada gascona que serà organizada per l'Associacion culturau de Samas. Ua missa en gascon qu'ei prevista a comptar de 10 òras. Que serà seguida d'un repaish gascon dab cantas e condes gascons a 12 òras 30 (reservacions : 07 83 73 84 53). 

Inf. : Programa sancèr sus www.xarnegueguna.fr — Corric : xarneguna@gmail.com

                                


Écrit par La Setmana le mardi avril 11, 2017
Category: news - Tags: xarnegu, cultura, lenga, occitan, basco, hestenau, tisner, trencadit, musica, trad

« Auloron (64) — L'ACCOB que contunha la soa batalha contra las peirèras - Breton : actors de la lenga recompensats »