Lo setmanièr occitan

Lo CIRDOC que passa en mòde estiu

La mediatèca deu CIRDÒC non cauma pas aqueth estiu e contunha d'organizar eveniments respècte a la lenga e la cultura nosta mes tanben a las de l'Euroregion (Occitania, Islas Balearas e Catalonha). Arron lo final deu Total Festum qui's debanarà aquera dimenjada a Castelnòu d'Arri en Aude (programa), lo CIRDÒC que participarà a divèrsas taulas arredonas au 12au Congrès de l'Associacion Internacionau d'Estudis Occitans (A.I.E.O) deu 9 au 15 de julhet a Albi en Tarn. Qu'i presentarà los sons projèctes en matièra de literatura e d'edicion d'òbras ancianas. 

Despuish lo 20 de junh e dinc a la fin deu mes de seteme, lo CIRDÒC qu'installa un dispositiu especiau dens la cort de la Topina (estanquet/tapas a Tolosa) : imaginatz-ve installats dens un transat tà har un cluc culturau ? Cascos que seràn hicats a disposicion dab los quaus e poderatz escotar divèrsas listas de cantas causidas per la mediatèca (musica actuau, navèra canta occitana, conferéncias o libes d'escotar…), ua faiçon plan agradiva d'apreciar lo riquèr musicau occitan. 

A comptar deu diluns 10 de julhet dinc au 1èr de seteme, la Mediatèca occitana que cambia d'oraris : de 9 ò 30 a 14 ò. Entà facilitar los manlèus e tornars pendent l'estiu, los prèstes que son perlongats a dus mes dinc a la rentrada. 

Inf. : CIRDÒC, 1 bis baloard Du Guesclin, Plaça deu 14 de julhet — 34500 Besièrs — Site : http://locirdoc.fr/E_locirdoc/ — Tel. : 04 67 11 85 10 — La Topina, Ostal d'Occitania, 11 arrua Malcosinat — 31500 Tolosa  Tel. : 06 15 32 34 73.


Écrit par La Setmana le jeudi juillet 6, 2017
Category: news - Tags: cirdoc, besiers, cultura, euroregion, topina

« Orlhac : presentacion del filme Lo Paure Baptista - Region ARA — Ua borsa au merit arrefusada per liceans »