Lo setmanièr occitan

Lo Cercle Occitan de Narbona animèt lo Total Festum

Ongan encara, fòrça monde venguèron festejar la Sant Joan, plaça Emile Digeon, darrièr la plaça cobèrta de Narbona. Un bèl programa foguèt prepausat als Occitans de la Narbonesa e als toristas qui descobriguèron una infima partida de la nòstra cultura. 

                        

L'acordeon de Guilhem Verger e la trompeta de Guillaume Gardey de Soos (La Guiguinche) animèt lo repais preparat per las Calandretas e l'alucatge de fuòc. Lo duò de musicaires de la region de Besièrs, Castanha é Vinovèl, faguèt bolegar los amators de balètis. Los non-iniciats poguèron aprénguer qualques danças occitanas. Las tradicionalas fogassas a l'anís, confeccionadas per la fornariá Anatoline foguèron ofèrtas al public qu'aprecièt aquel moment de partatge. Los mai temeraris sautèron lo fuòc jos la vigiléncia de Will Renart e de la Proteccion civila. 

                       

Lo concèrt del grop L'Art à Tatouille, amb Roland Ramade e Mme H, La Diva du Minervois, acabèt la serada. Pendent tota la manifestacion, los jòcs de fust d'Eole encantèron dròlles e grands. Libres occitans, CD, drapèls e autres articles a las colors occitanas foguèron prepausats sul taulièr tengut pels benevòles del Cercle Occitan de Narbona. 

Lo Cercle Occitan de Narbona adreça sos mai sincèrs remerciaments a tot lo public, als servicis municipals, la Proteccion Civila e als pompièrs per lor collaboracion. 
Grandmercé a Ràdio Lenga d'Òc, partenària istorica e fidèla de nòstra associacion. Aquela serada tradicionala, festiva e conviviala, beneficièt del sosten de la Region e de la vila de Narbona. 

Inf. : www.cercle-occitan-narbona.fr 


Écrit par La Setmana le jeudi juillet 6, 2017
Category: events - Tags: narbona, festum, musica, dança, tradicional

« Hestivòc 2017, los mèdias occitans e lo hestiv'OFF - Orlhac : presentacion del filme Lo Paure Baptista »