Lo setmanièr occitan

Legislativas Lanas — Candidats exclús deus debats

L’artista landés Didier Tousis (dreta fòto) que's lança en politica tà las Legislativas. En suberpés de tot partit politic, que’s presenta dab Dominique Villattes dens la dusau circonscripcion de las Lanas.

L’arribada au dusau torn d’un candidat que qualifica d’ « ultraliberalista » (sic) e de la candidata frontista, que possè lo duo a lançà’s en politica, un terrenh suu quau n’atenèvam pas briga lo cantaire landés. Que soslinhan la necessitat d’un debat democratic vertadèr a l’escala locau, un « armistici ciutadan ». « Qu’ei entad aquò, shens esperar ua ipotetica Viau Republica, que perpausam d’establir suu noste territòri, un parlament locau qui amassarà un collègi de representants d’associacions, de divèrs partits politics, de movements o simples ciutadans », çò declarèn dens lo comunicat de premsa. Aquestes parlamentaris landés qu’elegiràn un deputat, dont « l’integralitat deus mejans hicats a la soa disposicion, e serà utilizada a organizar ua democracia locau efectiva (acamps publics, debats, comunicacion taus ciutadans e decisions de l’Assemblada nacionau) ». E Didier Tousis e Dominique Villates de clavar la lor declaracion per « puish a que tot ei hèit entà empachar aquera navèra democracia peu haut, qu’apartien aus ciutadans de la crear d’en baish ».

Didier Tousis e Dominique Villattes, membres deu collectiu NouTous, que comencèn lo tribalh e lo 5 e 8 de mai, en organizar a Soston (40) un encontre dab divèrs representants de partits d’esquèrra. Lo Partit Communista, EELV que responón favorablament a l’invitacion e qu’estón obèrts au debat, quan France Insoumise, reticent, « resèrva la soa decision a la causida deus sons militants ». Lo Partit Socialista n’a peu moment pas balhat nada novèla aus dus candidats a las legislativas. « Qu’estó la seguida de la nosta proposicion de parlament locau d’installar un navèth utís de democracia locau shens esperar de decision ni de París, ni d’aulhors. Qu’avem la possibilitat de crear aquò donc que convidam los partits mes tanben las associacions e los ciutadans. Que son partents peu principi, quitament se a la debuta monde que disèvan qu’aquò èra ua idea utopista. Nosautes que hèm ua proposicion concrèta, qui ei possibla e realizabla, vam véder si cadun ei prèste a préner las lors responsabilitats. Qu’esperam que lo procèssus e va contunhar ».

Lo sénher Tousis que declarè ger dens un comunicat, estar decebut en descobrir a la lectura d'un article deu jornau lo Sud-Ouest, la tienguda d’un debat politic ger ser. Lo tàndem n’a pas recebut nada invitation tà participar. « Malament, un debat sens invitation que sembla mei a comunicacion, e a influéncia ordinària qu’a ua vertadèra volontat de confrontar ideas e de partatjar realitats ».

Lo candidat a la 2au circonscription de las Lanas que’n profieitè tà anonciar qu'avè contactat a la FDSEA e aus JA pertocant au projècte de construccion d'un gòlfe a Tòssa (40), shens aver avut nada responsa...

Inf. : http://didiertousis.legislatives2017landes.fr/

                                   


Écrit par La Setmana le jeudi juin 1, 2017
Category: news - Tags: politica, legislativas, eleccion, tousis, lanas, cultura, ecologia

« Aurelia Lassaque, semiaira de poesia - Monica Sarrazin premiada per la jurada Jaufre-Rudel »