Lo setmanièr occitan

La marca « Tarn, còr d'Occitania » que s'auhereish lo son 1èr hestenau !

L’ahuegament de la populacion tau tornar a las arraditz e l’interès creishent tà çò qui pertòca lo patrimòni, n’ei pas mei a desmostrar. Despuish dus ans, Tarn que tribalha la soa comunicacion sus la lenga e la cultura occitanas, e lo departament que creè « Tarn, còr d’Occitania ». Lo purmèr hestenau de la marca que’s debanarà los 23 e 24 de junh a Vièlhmur.

La marca « Tarn, còr d’Occitania » qu’estó creada dus ans a, peu Comitat Departamentau deu Torisme de Tarn (CDT). Lo departament que pona sus la cultura e la lenga occitanas entà dinamizar l’economia territoriau en atirar los toristas. Uei lo dia cap a 430 estructuras que son aderentas au projècte. Que va de l’artisan dinc a las mairias. Convencions que son signadas enter los actors economics tà har la promocion de l’occitan. En contrapartida, los signataris qu’utilizan a gratis la marca. Pas mensh de 17 panèus qu’estón installats a las entradas deu departament dab l’inscripcion « Tarn, còr d’Occitania ».
Los 23 e 24 de junh que’s debanarà lo purmèr hestenau « Tarn, còr d’Occitania » a Vièlhmur. Dus dias de concèrts, danças, marcats deus productors e artisans, jòcs ancians, mustras, visitas guidadas de la vila, huec de la Sent Jan o enqüèra conferéncias que seràn au programa de las festivitats. L’eveniment qu’ei organizat peu Departament deu Tarn en aliança dab la mairia de Vièlhmur e qu’estó causit per la Region Occitania/Pirenèus-Mediterranèa tà har partida de las manifestacions culturaus occitanas deu Total Festum edicion 2017.

Divés 23 de junh, arron l’obertura deus talhèrs e deu marcat deus productors, ua vrespada de conferéncias a l’entorn deu tèma « Lo patrimòni occitan au còr deus projèctes de territòri » que serà organizada. Que serà dividida en tres sessions. La purmèra, de 14 ò a 14 ò 30 que serà consacrada a l’occitan com patrimòni multidimensionau au servici de la valorizacion deus territòris e deus lors actors. Catherine Rabou, Conselhèra au Departament deu Tarn en carga de la cultura occitana e tanben maira de la vila de Vièlhmur, e Patric Roux (Fòto dreta ©A.S), Conselhèr a la Region Occitania/Pirenèus-Mediterranèa, delegat a la lenga e a la cultura occitanas, que’s relaiaràn tà parlar deu subjècte. Lo debat que seràn animat per Philippe Sour, Cargat de mission cultura occitana deu Departament deu Tarn.

La dusau session que s’articularà a l’entorn deu tèma « Occitan : de la compreneson d’un patrimòni a la comprenença d’ua ressorça contemporanèa ». Patric Sauzet, lingüista occitan, professor a l’Universitat Jean Jaurès de Tolosa, que presentarà ua conferéncia sus la lenga e la cultura occitanas « de la cultura quotidiana dinc au prestigi d’un patrimòni millenari ». Lo sénher Sauzet qu’ei l’autor dab Josiana Ubaud deu libe « Lo vèrb occitan » (Ais de Provença, Edisud, 1995). Jean Thomas, membre deu Conselh Lingüistic deu Congrès que parlarà de l’occitan com un utís de compreneson deu territòri dab ua presentacion sus la toponimia en país d’òc. La session animada per Benjamin Assié, Director deu CIRDÒC, que’s clavarà dab Ugo Lavorata, guida a la Hortalessa de Najac. L’especialista qu’amuisharà que l’occitan ei un descodader istoric qui valoriza lo patrimòni e mei especiaument l’arquitectura.
La darrèra session que començarà a 15 òras 30 e qu’averà per tèma « Occitan : ua ressorça patrimoniau au fondament de dinamicas territoriaus emergentas ». Sébastien Rayssac, Mèste de Conferéncias en Geografia a l’Universitat de Jean Jaurès de Tolosa, que descriptarà lo procèssus d’activacion de la ressorça culturau occitana. Philippe Sour que presentarà la marca territoriau « Tarn, còr d’Occitania » en presentar l’objectiu d’aquera operacion de comunicacion qui ei la sauvarguarda deu patrimòni occitan e la soa mobilizacion dens las politicas publicas. Fin finala, Laure Pages, Cargada de mission cultura(s), territòris e torisme deu Departament d’Aude qu’acabarà la vrespada de conferéncias universitàrias en respóner a la question « Quau integracion de l’occitan dens lo projècte de territòri ? ».
Aqueth vrèspe que mirarà a favorizar los escambis enter los actors economics, institucionaus e culturaus implicats dens las politicas publicas centradas sus l’activacion de la ressorça occitana.
Christian Rivière, Cargat de mission premsa de Tarn Torisme que concludirà los escambis en har un bilanç de las divèrsas presentacions e pausar la question, e’s pòt utilizar l’occitan com vector renovelat au servici de la comunicacion toristica ? A la fin d’aqueth purmèr dia, los organizators deu 1èr hestenau « Tarn, Còr d’Occitania », que recompensaràn aderents a la marca tau sostien e tribalh realizat despuish dus ans. Un detzenat d’actors qui òbran tà la sauvaguarda e la promocion de la lenga e de la cultura nostas que’s vederàn auherir l’estatut d’ambaishadors de l’occitan per la marca.

Lo Departament deu Tarn que segueish la soa campanha de comunicacion a l’entorn de l’occitan tot au long de l’annada. Suu lor site internet, los non-occitanofònes que poderàn apreciar de descobrir expressions, mots, arreproèrs que non sospieitavan d’aver quina origina que sia.

Inf. : tarncoeuroccitanie.com / fabrica.occitanica.eu/fr/total-festum / Programa deu hestenau
 

Fòto legenda : Aviada de la marca territoriau e deus sites web deu Comitat Departamentau deu Torisme de Tarn suu torisme culturau occitan (Donatien Rousseau - Mission fotografica deu Departament deu Tarn)


Écrit par La Setmana le jeudi juin 22, 2017
Category: news - Tags: Tarn, marca, economia, territori, occitan, departament, torisme, setmana

« Lo nacionalisme còrse en fòrça a l'Assemblada - Los 5 ans deu Jornalet au CIRDÒC (Audio) »