Lo setmanièr occitan

La 19au edicion de Trad'envie que s'aprèssa

Deu 24 au 27 de mai, la vila de Pavia qu'arcuelherà la 19au edicion de Trad'Envie. Trad'Envie que vadó de l'evolucion d'un grop d'Arts e de tradicions popularas aperat « Ensemble popular de Gasconha ». Vadut ua referéncia, lo hestenau que vòu har descobrir au public locau e nacionau, musicas tradicionaus vienudas d'ací e d'aulhors e perméter l'escambi e l'enriquiment musicau. Despuish la purmèra edicion, cap a 380 grops que's succedín a Trad'envie. 

Lo grop La Cleda qu'aubrirà lo bal dimèrcs 24 dab un concèrt a comptar de 18 òras 30. La Cleda que perpausa musicas vienudas de Bearn, d'Auvèrnhe, de Lemosin e de las Cevenas. 
Lo 25 de mai ser, a la sala deu dòma a Aush, Brotto-Lopez que hestejarà los sons 15 ans d'amistat musicau en tornar visitar lo lor repertòri acompanhat d'ua armonia de 50 musicaires e d'un pianista jazz, Jean-Christophe Cholet.   

Lo 26 de mai, a la sala polivalenta de Pavia, bal dab ZEF, ua mescla de personalitats hòrtas tà un concèrt e un bal, e ua musica electrizanta, deu neo-trad a las musicas actuaus. 

Trad'Envie que son tanben estagis d'instruments e de canta los dus purmèrs dias. De 9 ò a 12 ò e 14 ò a 16 ò dijaus e divés, que poderatz apréner acordeon diatonic dab Marie Constant, viela dab Yann Gourdon, de danças en coble dab Lionel Dubertrand e Koen Dhondt, de vriolon dab Basile Bremaud e de cantas occitanas dab Matèu Baudoin. 

Inf. : Programa sancèr sus www.tradenvie.fr — Tel. : 06 81 33 11 52 — Mèl : tradenvie@contact.fr — Tarifas : concèrts enter 10 e 17 €, estagi 2 dias (concèrts+bals mes shens repaish) : 85 €. 

                                         


Écrit par La Setmana le vendredi mai 12, 2017
Category: news - Tags: tradenvie, gers, aush, musica, cultura, occitan, brotto, lopez, zep

« La Setmana sus Ràdio País ! - Ua peticion tà la partença deu gavidaire d'Emmaüs Lescar-Pau »