Lo setmanièr occitan

Jornada dedicada aus mèdias en lenga aranesa lo 7 de julhet

Lo 7 de julhet a la sedença de l'Academia aranesa de la lenga occitana, l'Institut d'Estudis Aranés qu'organizarà ua jornada sus la lenga e los mèdias de comunicacion. Lo 7 de junh passat, lo president de l'IEA-Academia aranesa de la lenga occitana, Jusèp Loís Sans, que hasó un bilanç deus 10 ans d'oficialitat de l'occitan-aranés davant la comission de Cultura deu Parlament de Catalonha. Despuish 1994, l'emplec de la lenga en societat qu'avó hòrtament diminuit. Totun, las escòlas en immersion e lo desvolopament de las divèrsas accions de defensa de la lenga capvath la politica lingüistica deu departament deu Conselh Generau d'Aran e de la Generalitat de Catalonha que permetón de restablir la situacion chic a chic. 

« Enes darrèri 35 ans damb era recuperacion dera democracia, era Val d'Aran a compdat damb mieis de comunicacion tant publics coma privadis, en premsa escrita (Avui e Aué), revistes (publicades en part en aranés ; Aran Nau, TOT Aran, Era Borrufa), ràdio (Catalunya Ràdio e Catalunya Informació) e TV (Tv3-Meddia Aranés,3/24, BTV, Aran TV). En aguest sens, era Corporacion Catalana de Mieis Audiovisuaus produsís en aranés programes de television e ràdio. Des der an 1988 eth grop d'emissores de Catalunya Ràdio emet programes de desconnexion en aranés e des deth mes d'octobre de 2009 aufrís, a trauès deth 3/24, un espaci informatiu diari de television en aranés entà tot Catalonha, e un espaci dedicat ena Val d’Aran en portau d'internet TV3.cat, damb informacions sus espacis produsidi e dobladi en aranés », çò escriu l'IEA-Academia aranesa dens un comunicat oficiau.

Atau, los mèdias que son vaduts actors màgers dens la societat. La jornada de debat e de reflexion deu 7 de julhet que serà consacrada au ròtle d'aquestes medias de comunicacion dens la preservacion e la promocion de la lenga, dens lo son emplec en societat e lo lor aviéner possible que serà debatut. Jornalistas responsables de mèdias e d'espacis dens los mèdias de comunicacion en lenga aranesa que seràn convidats a participar aus escambis. 

Inf. : www.institutestudisaranesi.cat

                                    


Écrit par La Setmana le mercredi juin 28, 2017
Category: news - Tags: aran, media, comunicacion, lenga, occitan

« Dilèma en Gironda : que causir lo 1èr de julhet ? - (33) Vilandraut — Nueits Atipicas »