Lo setmanièr occitan

IEO Lanas — Lançament de Gascons cap e tot !

Arron la crida de donacion tà l'Institut d'Estudis Occitans au mes de heurèr passat, la seccion landesa de l'IEO, « Gascons, Cap e tot » qu'estó oficiaument aviada dissabte passat a Soston (40). 
Thierry Cahuzac (Fòto baish), president de l'IEO Gironda que presentè lo riquèr culturau de las Lanas en matièra de literatura (tribalh deishat per Felix Arnaudin e Bernard Manciet), d'ensenhament dab las classas bilinguas obèrtas dens sheis vilas landesas, Monthòrt, Sent Martin, Morcens, Dacs, Bocau-Vielh, Magesc e Tartàs. L'IEO que's balha per mission de difusar la lenga nosta via mei que mei l'edicion de libes e de tèxtes, atau com l'ensenhament. Qu'ei tanben un centre de ressorças dab un servici d'arrevirada, deu patrimòni toponimic e lo desvolopament de l'arcuelh bilingüe dens lo maine de la petita enfança. 

                                        

Au demiei deu monde convidats tà parlar de l'importància de la creacion de la seccion landesa de l'IEO, Yan Cozian (Fòto La Semaine des Patrimoines Vivants), bohaire e gavidaire deu departament musicas e danças tradicionaus au Conservatòri de las Lanas. Lo musicaire que soslinhè la necessitat de desvolopar la preséncia de l'occitan-gascon suu territòri, « los toristas que cèrcan auta causa que la mar e lo sable blanc ». Lo sénher Cozian qu'expliquè la dificultat de tribalhar sus la visibilitat de la cultura nosta : « Quan arribèi, cap a 99 % deus Landés ne coneishèvan pas briga l'instrument de la boha, adara, n'i a pas sonque 95 % deus Landés qui ne coneishen pas briga la boha ». La creacion d'un hestenau de boha a Soston qu'ei en discutida, un projècte qui serà qu'ac esperam sostienut per Gascons Cap e tot. 

                                                

La data de la purmèra amassada publica de l'IEO Lanas non deveré pas trigar, tà har conéher lo tribalh hèit a l'entorn de la lenga e los projèctes en cors.

                                    

AUDIO — Thierry Cahuzac, president de l'IEO Gironda e de Gascon Lanas que'ns digó mei suus objectius de la seccion landesa via los utís aviats per l'IEO en generau e utís mei especifics au territòri. La soa entervista qu'ei seguida per Pierre Froustey, maire de Bocau-Vielh (Fòto LS, au-dessús), present tà testimoniar de çò qui's hè tau gascon en la soa vila. Lo reportatge que's clava dab Christine Leger membra deu Cafè Gascon, vienuda préner « quauquas entrensenhas » suu subjècte. Entervistas realizadas aus micros de La Setmana e de Joan-Nadau Commères de Ràdio País : 


Écrit par La Setmana le lundi mai 15, 2017
Category: news - Tags: lanas, gascon, soston, cozian, cahuzac, barris, guit, ensenhament, IEO, cafè

« Mèdias : Lo Jornalet a cinc ans ! - La Setmana sus Ràdio País ! »